Ikipe y’u Rwanda  igiye gukinira imikino ibiri ya gicuti muri Maroc

Umutoza mukuru w’ikipe y’u Rwanda «Amavubi », Carlos Alos Ferrer yahamagaye abakinnyi 24 bagomba gutangira kwitegura imikino ibiri ya gicuti izabera muri Maroc.

Muri iyi mikino harimo uzahuza ikipe y’u Rwanda na  Equatorial Guinnea naho undi hakaba hataramenyekana ikipe izahura n’u Rwanda. Iyi mikino izakinwa  mu gihe cyagenewe imikino ya gicuti mpuzamahanga kuva taliki 20 kugeza 26 Nzeri 2022.

Iyi mikino ya gicuti ikaba igamije gufasha ikipe y’u Rwanda kwitegura imikino y’umunsi wa 3 n’uwa 4 izaba muri Werurwe 2023  mu gushaka itike ya CAN 2024 izabera muri Cote d’Ivoire. Muri iyi mikino ikipe y’u Rwanda iri mu itsinda L hamwe na Mozambique, Senegal na Benin. Ikipe y’u Rwanda mu mikino ibiri iheruka mu itsinda L yanganyije na Mozambique igitego 1-1 itsindwa na Senegal igitego 1-0.

Muri Werurwe 2023, mu mikino y’umunsi wa 3 n’uwa 4, ikipe y’u Rwanda izakina na Benin, umukino ubanza ubere Cotonou naho uwo kwishyura ubere mu Rwanda.

Mu rwego rwo kwitegura iyi mikino mpuzamahanga ya gicuti, umutoza w’Amavubi, Carlos Alos Ferrer yahamagaye abakinnyi biganjemo abakina hanze y’u Rwanda. Muri 24 harimo 14 bakina hanze y’u Rwanda, muri aba  hakaba harimo 5 bahamagawe bwa mbere bose bakaba bakina ku mugabane w’u Burayi.

Aba ni   Itangishaka Trey Ryan  ukinira Standard de Liege mu Bubiligi, Kalisa Sven  ukinira ikipe ya Etzella Ettelbruck muri Luxembourg na Ishimwe Gilbert ukinira ikipe ya Orebro muri Suwede, aba bakaba bakina hagati mu kibuga. Hari kandi Sahabo Hakim ukinira ikipe ya Lille mu Bufaransa na Habimana Glen ukinira ikipe ya Victoria Rosport muri Luxmbourg  bakaba ari ba rutahizamu.

Abakinnyi 24 bahamagawe

Abanyezamu: Ntwari Fiacre (AS Kigali) na Kimenyi Yves (Kiyovu).

Myugariro: Ngwabije Bryan (Andrezieux-France), Ndayishimiye Thierry (Kiyovu), Imanishimwe Emmanuel (FAR Rabat-Maroc), Fitina Ombalenga (APR FC), Serumogo Ali (Kiyovu), Mutsinzi Ange Jimmy (Trofense-Portugal), Manzi Thierry na Niyomugabo Claude (APR FC).

Hagati: Bizimana Djihad (Deinze-Belgium), Itangishaka Trey Ryan (Standard de Liege-Belgique), Rubanguka Steven (Zimbru-Chisinau-Moldova), Niyonzima Ally (Bunamuru FC-Burundi), Kalisa Sven (Etzella Etllbruck-Luxembourd), Nishimwe Blaise (Rayon Sports), Ishimwe Gilbert (Orebro-Sweden) na Rafael York (Eskilstuna-Sweden).

Rutahizamu: Sahabo Hakim (Lille-Frane), Habimana Glen (Victoria Rosport-Luxmbourg), Muhire Kevin (Al Yarmok-Kuwait), Tuyisenge Arsene (Rayon Sports), Mugunga Yves (APR FC) na Kagere Meddie (Singida Stars-Tanzania).

Umutoza mukuru ni Carlos Alos Ferrer yungirijwe na Jacint Magrina na Mulisa Jimmy naho umutoza w’Abanyezamu akaba Mugabo Alexis.