The Ben na Bruce Melodie baciye impaka  muri ‘The New Year Gloove’

Abanyarwanda babivuze ukuri ngo iminsi iba myinshi igahimwa n’umwe gusa, ni ko byagenze mu gitaramo cya ‘The New Year Gloove’ cyabaye ku nshuro ya kabiri kigahuzaga The Ben na Bruce Melodie nk’abahanzi bakuru.

Aba bahanzi bamaze iminsi bahanganishije abafana babo, baciye impaka bakora ibidasanzwe kuko bamwe batizeraga neza ko bashobora guhurira ku rubyiniro. 

Ahagana saa saa ni bwo imiryango ya BK Arena yafunguwe mu gihe amatike yose yashyizwe ku isoko yari yamaze kurangira hakiri kare.

Ni igitaramo cyayobowe n’abanyamakuru Anita Pendo afatanyije na Lucky Nzeyimana basanzwe ari abashyushyarugamba beza b’ibitaramo.

Ni igitaramo cyagaragayemo abahanzi batandukanye ndetse n’abavanga imiziki bose bagendaga basimburana ku rubyiniro.

Urubyiniro rwasimburanyeho abarimo  DJ Wayv, DJ Flix, DJ Brianne n’abandi barimo Yeweeh, Alto, Gisa cy’Inganzo, Diez Dola n’abandi bose bishimiwe n’abitabiriye igitaramo.

Byasaga nko kuva mu bwiza bajya mu bundi kuko ahagana saa yine n’iminota 50 (22:50) ari bwo Bruce Melodie yahawe umwanya ku rubyiniro BK Arena yose igahaguruka. 

Umunyamakuru Bianca yagiye ku rubyiniro ateguza abantu ko Bruce Melodie agiye kuza ku rubyiniro mu gihe Symphony Band biteguraga kumucurangira.

Akigera ku rubyiniro, BK Arena yose yumvikanagamo amajwi abantu bavuga bati “Munyakazi”, akomereza ku kubashimisha aririmba izirimo HandsUp, Ndakwanga, Ikinyafu yakoranye na Kenny Sol, Abu Dhabi, Sawa Sawa, Funga Macho n’izindi zose akaziririmbana n’abafana be.

Bruce Melodie yamaze hafi isaha ku rubyiniro aririmba indirimbo ze zose zakunzwe zaba iza vuba n’izakera, inyinshi yanazibutswaga n’abakunzi be.

Nyuma Bruce Melodie, Dj Briane ni we wahise ajya ku rubyiniro asusurutsa abitabiriye igitaramo.

The Ben we yaserutse ku rubyiniro ahagana saa sita na 50 z’igicuku (00:50) ahera ku ndirimbo ye nshya yise ‘Indabo Zanjye’ akurikizaho izirimo ‘Why’ yakoranye na Diamond Platinumz, Ndi uw’i Kigali yakoranye na K8 na Meddy, Fine Girl, akurikizaho Sibeza yakoranye na Tom Close wamusanze ku rubyiniro bakaririmbira.

Bakiri aho The Ben yagize ati: “Iyo aba atari Tom, ntabwo nari kuba mpari.”

The Ben yaje kwakira ku rubyiniro Tom Close na Rema Namakula baririmbana indirimbo zitandukanye bafitanye birushaho gutuma abantu bizihirwa.

Igitaramo cyasoje saa 02:15, The Ben ashimira abafana be ati: “Mwakoze cyane igitaramo ‘The New Year Groove’ kirarangiye.”

Yasoreje ku ndirimbo ye ‘Thank You’ yo gushima Imana. Ni mu gihe umubare munini w’abari bitabiriye icyo gitaramo bo batashye hakiri kare.

Mu bandi basusurukije igitaramo harimo itorero Inyamibwa, Chorale Gisubizo n’abandi bahanzi bagiye bafitanye indirimbo na The Ben mu gihe yafashe umwanya muto akazirikana Yvan Buravan na Jay Polly aririmba izirimo Malayika no Kwicuma bahuriyemo na Jay Polly.

The Ben aherutse gutangaza ko ‘The New Year Gloove’ ari igitaramo kizajya gihuriramo abahanzi batandukanye aho hari n’ubwo azajya aba atari buririmbemo.