Umunyamabanga Mukuru wa OIF yakiriye Minisitiri Amb. Nduhungirehe

Umunyamabanga Mukuru wa OIF yakiriye Minisitiri Amb. Nduhungirehe

Umunyamabanga Mukuru w’Umuryango w’Ibihugu bikoresha ururimi rw’Igifaransa (OIF), Louise Mushikiwabo, yakiriye mu biro bye Minisitiri w’Ububanyi n’Amahanga n’Ubutwererane Amb. Olivier Jean-Patrick Nduhungirehe baganira ku ngingo zitandukanye.

Ibiro by’Umunyamabanga Mukuru wa OIF kuri uyu wa 29 Ukwakira 2025, byatangaje ko abayobozi bombi baganiriye ku myiteguro y’inama ngarukamwaka izahuza ba Minisitiri b’Ububanyi n’Amahanga b’ibihugu bigize Umuryango wa OIF, iteganyijwe i Kigali kuva tariki 19-20 Ugushyingo 2025.

Izi nama za ba Minisitiri zigira uruhare rukomeye mu gushimangira umubano hagati y’ibihugu bivuga Igifaransa, guteza imbere ubufatanye, no kwimakaza indangagaciro zihuriweho n’Umuryango w’Ibihugu bikoresha ururimi rw’Igifaransa.

Guhitamo u Rwanda nk’igihugu kizakira iyi nama, byerekana uruhare rwarwo rugaragara n’ubwitange bwarwo mu bikorwa by’Umuryango wa OIF.

Inama ya 46 ya ba Minisitiri bo mu bihugu bigize Umuryango OIF, yabereye i Paris mu Bufaransa, inemerezwamo ko inama ya 47 izakirwa n’u Rwanda mu 2025.

Umuryango w’Ibihugu bikoresha ururimi rw’Igifaransa, ni umuryango watangijwe tariki 20 Werurwe 1970, u Rwanda ruba umunyamuryango wawo mu 1970 ugitangira.

Kuri ubu Umunyamabanga Mukuru w’uwo muryango ni Umunyarwandakazi Louise Mushikiwabo, watowe n’Abakuru b’Ibihugu biwugize mu Ukwakira 2018.

Mu Ukwakira 2022 Mushikiwabo yongeye gutorerwa kuba Umunyamabanga Mukuru w’Umuryango w’Ibihugu bivuga ururimi rw’Igifaransa.

Kuri ubu uyu muryango ugizwe n’ibihugu 93, birimo ibihugu binyamuryango 56 byuzuye (Full members), ibihugu 5 byiyunze n’ibihugu n’ibindi 32 by’indorerezi.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27