Kwibuka31: U Rwanda rwashimiye ibihugu inshuti n’Imiryango Mpuzamahanga bifatanyije n’Abanyarwanda

Kwibuka31: U Rwanda rwashimiye ibihugu inshuti n’Imiryango Mpuzamahanga bifatanyije n’Abanyarwanda

Minisiteri y’Ububanyi n’Amahanga n’Ubutwererane yashimiye Guverinoma z’ibihugu, Imiryango Mpuzamahanga n’iyo mu Karere, inshuti z’u Rwanda ndetse n’abatuye Isi yose bifatanyije n’Abanyarwanda muri iki gihe cyo kwibuka ku nshuro ya 31 Jenoside yakorewe Abatutsi mu 1994.

Jenoside yakorewe Abatutsi mu 1994, yahitanye abasaga miliyoni mu minsi 100 gusa. Yakoranywe ubukana bukomeye kandi mu gihe gito kuko ku munsi hicwaga Abatutsi basaga 10 000.

Amb Jean Patrick Olivier Nduhungirehe, Minisitiri w’Ububanyi n’Amahanga n’Ubutwererane, yabigarutseho kuri uyu wa Kabiri tariki 08 Mata 2025, abinyujije mu butumwa yashyize ku rubuga rwa X rwahoze ari urwa Twitter.

Yagize ati: “Ubutumwa bwanyu no kwitabira ibikorwa byo kwibuka muri Kigali n’ahandi hose ku Isi, ni ubuhamya bw’ubucuti bushimangira ubwitange bwanyu bwo kurwanya Jenoside n’ingengabitekerezo yayo. Twese hamwe, dukomeze kwibuka, twiyubaka.”

Ubutumwa bwatanzwe n’Umunyamabanga Mukuru w’Umuryango w’Abibumbye Antonio Guterres, yavuze ko Jenoside yakorewe Abatutsi mu 1994 yateguwe kandi ko atari ubwicanyi ndengakamere bwahutiweho.

Yagize ati: “Jenoside yakorewe Abatutsi mu 1994 ntabwo ari ubwicanyi ndengakamere bwatunguranye. Yaragambiriwe, yatekerejweho mbere kandi yarateguwe.”

Perezida w’Ubufaransa, Emmanuel Macron, yagaragaje ko u Bufaransa bwiyemeje guha agaciro kwibuka, ukuri n’ubutabera, ari na yo mpamvu bwifatanyije n’u Rwanda kwibuka ku nshuro ya 31 Jenoside yakorewe Abatutsi mu 1994. 

Muri ubwo butumwa yanyujije ku mbuga nkoranyambaga, Perezida Macron yagize ati: “Uyu munsi, u Bufaransa buramenyesha Abanyarwanda ibitekerezo byabwo n’uburyo bubashyigikiye byimazeyo.

U Bufaransa burashima ukwihangana gutangaje kw’Abanyarwanda babashije kongera guhaguruka bakubaka ahazaza hashingiye ku bumwe n’ubwiyunge.”

Icyumweru cy’icyunamo cyatangijwe na Perezida wa Repubulika Paul Kagame na Madamu Jeannette Kagame, cyitabirwa n’abahagarariye ibihugu byabo mu Rwanda ndetse n’abahagarariye Imiryango Mpuzamahanga mu Rwanda.

Minisitiri w’Ububanyi n’Amahanga n’Ubutwererane Amb Nduhungirehe Olivier yashimiye ibihugu byifatanyije n’u Rwanda kwibuka ku nshuro ya 31 Jenoside yakorewe Abatutsi mu 1994
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27