RwandAir igiye gutangira ingendo zihuza Kigali na Bridgetown

RwandAir igiye gutangira ingendo zihuza Kigali na Bridgetown

Kuri uyu wa Gatatu taliki ya 9 Ugushyingo, Leta y’u Rwanda n’iya Barbados zashyize umukono ku masezerano y’ubufatanye mu guteza imbere ingendo zo mu kirere hagati y’ibihugu byombi, aho RwandAir ibonye amahirwe yo gukora ingendo zihuza Kigali n’Umurwa Mukuru w’icyo gihugu, Bridgetown.

Ni amasezerano y’ubwikorezi bwo mu kirere yiyongera ku yasinywe muri Mata, yorohereza impande zombi gukorera mu kirere cy’ibihugu byombi nta mususu.

Uyu munsi u Rwanda rwari ruhagarariwe na Minisitiri w’Ibikorwa Remezo Dr Ernest Nsabimana, na Minisitiri w’ububanyi n’amahanga n’Ubucuruzi Mpuzamahanga wa Barbados, Kerrie D. Symmonds ari na bo bashyize umukono kuri ayo masezerano.

Minisitiri w’Ibikorwa remezo Dr Ernest Nsabimana avuga ko aya masezerano ashimangira icyerekezo u Rwanda rufite cyo kuba igicumbi mu guteza imbere ingendo zo mu kirere hirya no hino ku Isi.

Minisitiri Dr. Nsabimana akomeza avuga ko nyuma y’aya masezerano u Rwanda rugiye kureba uburyo RwandAir yatangira gukorera ingendo mu gihugu cya Barbados.

Ku ruhande rwa Barbados, Minisitiri Kerrie Symmonds we avuga ko igihugu cya Barbados cyifuza ko RwandAir yatangira gukorera ingendo muri Barbados vuba bishoboka. 

Ibi biraterwa n’uko Igihugu cya Barbados cyashyize imbaraga mu guteza imbere ubukerarugendo, iyi mikoranire ikaba yafasha iterambere ry’ibihugu byombi.

U Rwanda kandi rwasinyanye amasezereno y’ubufatanye na Barbados mu bijyanye no guteza imbere imikino. Aya masezerano akubiyemo imikoranire mu guhanahana impuguke n’abatoza bazobereye mu mikino itandukanye.

Kuri ubu RwandAir igira mu byerekezo bisaga 25 mu bihugu 21 byo ku Mugabane w’Afurika, u Burayi, Uburasirazuba bwo Hagati n’Aziya.

Minisitiri wa Siporo Munyangaju Mimosa Aurore, yavuze ko ku ikubitiro u Rwanda rwifuza gutangiza umukino wa Road Tennis  igihugu cya Barbados kikaba gifite inzobere nyinshi muri uyu mukino, ubu hari ahantu 3 mu Mujyi wa Kigali hamaze gutegurwa hazajya hakinirwa uyu mukino ukiri mushya mu Rwanda.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27