Rutsiro: Umugore wafashwe yenga ‘Urubyutsa’ yaciwe miliyoni 1 Frw

Rutsiro: Umugore wafashwe yenga ‘Urubyutsa’ yaciwe miliyoni 1 Frw

Umugore w’imyaka 27 wo mu Mudugudu wa Satinsyi, Akagari ka Kirwa, Umurenge wa Murunda, Akarere ka Rutsiro, wafatiwe mu cyuho amaze kwenga litiro 80 z’inzoga itemewe yitwa ‘Urubyutsa’ yaciwe amande ya miliyoni imwe y’amafaranga y’u Rwanda n’inzoga yari amaze kwenga ziramenwa.

Abaturage bashinja iyi nzoga y’inkorano gukenesha imiryango myinshi no kuyitezamo umutekano muke.

Umwe mu baturage batanze amakuru y’iyo nzoga bataramenya ibyo ikorwamo, yavuze ko isa n’amazi y’ibirohwa ikana iri mu zikomeje kubateza umutekano muke mu miryango n’urubyiruko ruyinywa rukaba imburamukoro.   

Ati: “Urubyutsa ni inzoga mbi cyane nubwo mbona n’abagore n’urubyiruko bayikunda. Bavuga ko ihendutse kuko igicupa cyayo kinini kitarenga amafaranga 500, ariko ububi bwayo bugaragara k’umaze kuyisinda kuko ateza umutekano muke haba mu rugo iwe no mu baturanyi.”

Umunyamabanga Nshingwabikorwa  w’Umurenge wa  Murunda Niyodusenga Jules, avuga ko uyu mugore yasanzwe akorera iyi nzoga mu Gasantere ka Santinsyi ari na ho atuye.

Ubuyobozi bwayimennye ndetse anamenyeshwa ko aciwe amande Atari munsi ya miliyoni imwe y’amafaranga y’u Rwanda.

Ati: “Izi nzoga benga ntiziba zujujue ubuziranenge, nta n’uzi mu by’ukuri ibyo bazikoramo byose. Gusa uyinyoye imuhindura ubwonko agatangira guteza umutekano muke haba mu kabari aho anywera haba no mu rugo iwe. Ni yo mpamvu uwo dufashe iyo nzoga ihita imenwa akanacibwa amande atari munsi ya miliyoni y’amafaranga y’u Rwanda, n’uyu mugore agomba kuyatanga.”

Avuga ko n’ubundi muri aka gace haherutse gufatirwa undi amaze kwenga litiro zirenga 100 ziramenwa, acibwa amande atari munsi ya miliyoni, uwari warabihinduye bizinesi ikomeye yaranakoze igisa n’uruganda acibwa amande ya miliyoni  2 z’amafaranga y’u Rwanda.

Ashimira abaturage babatungiye agatoki uwayengaga agafatwa, ikamenwa ataratangira kuyikwirakwiza ku dusantere hirya no hino nk’uko abazenga basanzwe babigenza.

Asaba abakora inzoga nk’izi zitujuje ubuziranenge kubireka, n’abaturage bakareka kuzinywa, bakanywa izujuje ubuziranenge nubwo zabahenda ariko zitabateza ibibazo by’ubuzima, n’abazi aho ziri bakahatungira agatoki ubuyobozi kugira ngo zihashywe kubera  ko ngo nta cyiza cyazo, ahubwo ibibi zibakururira ari byo byinshi.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27