Peru: 13 bari barashimutiwe mu kirombe cy’amabuye y’agaciro babonetse bapfuye

Peru: 13 bari barashimutiwe mu kirombe cy’amabuye y’agaciro babonetse bapfuye

Abantu 13 bo muri Peru bari barashimutiwe mu kirombe cy’amabuye y’agaciro cya sosiyete ikora ubucukuzi ya Peruviya Poderosa, ikorera mu gace ka Pataz,mu Majyaruguru y’Umujyi wa Lima babonetse bapfiriye aho bakoreraga nkuko byatangajwe n’ubuyobozi.

Abo bakozi bari barashimuswe tariki ya 25 Mata, nyuma y’icyumweru kirenga bashimuswe imirambo yabo iboneka mu kirombe bakoreragamo ifite ibimenyetso byo gushinyagurirwa.

BBC yatangaje ko muri bo hari abagaragaye bakaswe imitwe abandi bafite ibimenyetso bigaragaza ko barashwe.

Abahohotewe bari boherejwe guhangana n’itsinda ry’abagize uruhare mu bucukuzi bw’amabuye y’agaciro muri ako gace ariko butemewe, gusa baza gushimutwa n’agatsiko k’abagizi ba nabi bashakaga kwigarurira icyo kirombe.

Bakomeje kuba ingwate ndetse mu cyumweru gishize mbere y’uko babagaragaza bishwe abo bashimusi babanje kwandikira ubutumwa bugufi abo mu miryango yabo babatera ubwoba.

Ku wa gatanu w’icyumweru gishize iyo sosiyete ifite abakozi 8 000 yasohoye itangazo rivuga ko ibabajwe n’ukuntu inzego z’umutekano zidakora ibishoboka ngo zibuze ubucukuzi bw’amabuye bukorwa mu buryo butemewe.

Ibyo bibaye mu gihe ubucukuzi bw’amabuye y’agaciro butemewe n’amategeko bwiyongereye muri Peru.

Byateje umutekano muke ahakorerwa ibyo bikorwa, ubwicanyi buriyongera ndetse n’ibihugu byinshi muri Amerika y’Amajyepfo byashyizeho ibihe bidasanzwe byo guhangana n’icyo kibazo.

Ariko nanone kugira ngo inzego zitandukanye zihangane n’ubucukuzi butemewe biracyari ingorabahizi kubera kutubahiriza amategeko, ubushobozi buke bw’inzego z’umutekano, n’ubucuruzi bw’ibiyobyabwenge bukomeje gufasha abagizi ba nabi gukomeza ibikorwa byabo.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27