Rev. Past. Dr Rutayisire yibukije urubyiruko kugira intego y’icyo babereyeho

Rev. Past. Dr Rutayisire yibukije urubyiruko kugira intego y’icyo babereyeho

Rev. Past Dr Antoine Rutayisire, yahishuriye urubyiruko icyabafasha guhangana n’ibibazo byo mu mutwe bishingiye ku ndwara y’agahinda gakabije kuko abenshi mu rubyiruko bakunze kwibasirwa n’iyo ndwara.

Asanzwe azwiho kuba inshuti y’urubyiruko bitewe n’uko mu biganiro bye akunze kwibanda cyane ku nama zabafasha, kubera ko ari ikigero gikunze guhura n’ibigoye byinshi, bakisanga bakeneye inama z’ababaruta kugira ngo bashobore guhangana nabyo.

Ubwo yari yatumiwe mu gitaramo cy’urwenya cya Gen-z Comedy cyabaye mu ijoro ry’itariki ya 29 Gicurasi 2025, Rev. Past Dr Rutayisire yabajijwe ibituma urubyiruko runyura mu bigoye hakabamo abananirwa kwihangana bagahitamo kwiyahura.

Mu gusubiza uyu mushumba yagize ati: “Hari umwana umwe wagerageje kwiyahura, hanyuma tuganiriye ndamubaza nti ese hari umuntu wari wakubaza ngo ubereyeho iki? Arambwira ati oya, nti, nagerageje kukuvura ntawe urakubaza icyo ubereyeho, ndamubwira nti umunsi uzamenya icyo ubereyeho, ubuzima buzoroha. Wowe uri hano ukwiye kumenya icyo ubereyeho.”

Yagerageje kubaza abitabiriye icyo gitaramo icyo babereyeho, umwe mu rubyiruko yamusubije ko abereyeho kwishima. Agendeye kuri icyo gisubizo Dr Rutayisire amusubiza ko iyo atari intego y’ubuzima.

Ati: “Kwishima? Iyo si intego y’ubuzima, ibyo ni bito cyane kuko urara useka uyu mugoroba ejo mu gitondo nta munyarwenya uzaba uhari wo kugusetsa, shaka intego nini yagutera imbaraga zo kubaho.”

Raporo y’Umuryango Mpuzamahanga wita ku buzima (WHO), igaragaza ko abagera kuri milliyoni 280 ku Isi barwaye indwara y’agahinda gakabije, kandi hatagize igikorwa, mu 2030 izaba iri imbere mu zizahitana benshi ku Isi.

Buri mwaka abarenga 800 000, bari mu kigero cy’imyaka 15-29, bapfa bazize kwiyahura kubera agahinda gakabije.

Rev. Past Dr Antoine Rutayisire yari umutumirwa mu gace ka Meet me to night
Urubyiruko rwibukijwe kugira intego y’ubuzima mu kurwanya indwara y’agahinda gakabije kabibasiye
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27