Nyamagabe: Hakozwe ubukangurambaga bwo  kurwanya ibura ry’amaraso mu mubiri

Nyamagabe: Hakozwe ubukangurambaga bwo  kurwanya ibura ry’amaraso mu mubiri

Mu Murenge wa  Cyanika mu Karere ka Nyamagabe, habereye  ubukangurambaga ku ruhare rw’imirire myiza mu kurwanya ibura ry’amaraso (Anemia) by’umwihariko mu rubyiruko. Bwitabiriwe n’abaturage, abayobozi b’Akarere n’abafatanyabikorwa bako.

Ababwitabiriye basobanuriwe uruhare rw’imirire myiza mu gukumira ibura ry’amaraso bagaragarizwa n’ibiribwa byabafasha kwita kuri iyo mirire, hanatangwa serivisi z’ubuzima zo kuboneza urubyaro, gupima amaraso, ubuzima bw’imyororokere, kwirinda no gupima SIDA no gukingira COVID-19.

Ubu bukangurambaga bwateguwe ku bufatanye bw’Akarere,  Umushinga Orora Wihaze (muri gahunda yo kunoza indyo yuzuye) n’Ingobyi Activity (muri gahunda yo guteza imbere ubuzima bw’umwana, urubyiruko n’umubyeyi).

Umuyobozi w’Akarere ka Nyamagabe  wungirije ushinzwe Iterambere ry’Ubukungu, Habimana Thadée yatanze  ubutumwa asaba abaturage kwita ku mirire myiza, bagategura  amafunguro bifashishije ibirirwa biboneka hafi yabo.

Ati: “Iyo bavuze ibiryo byiza ntabwo bavuga ibizava mu mahanga, hano iwacu birahari”.

Yasabye ababyeyi  kugira isuku ahategurirwa ibiribwa, ku bwiherero, ku bikoresho, ku mubiri kugira ngo abana babashe gukura neza bazirana n’indwara yo kubura amaraso n’izindi ndwara. Asaba abakora mu buzima n’uburezi kunganira inzego z’ibanze mu kubikurikirana.

Umuyobozi w’Ishami ry’imirire n’isuku  mu Kigo cy’Igihugu gishinzwe Imikurire no Kurengera Umwana (NCD), Uwonkunda Irène yashimye Akarere ka Nyamagabe kagabanyije igwingira mu bana bari munsi y’imyaka itanu ku kigero kiri hejuru,  avuga ko ubu bukangurambaga buzafasha gukomeza guhangana n’indwara ziterwa n’imirire mibi.

Inzobere mu birebana n’ubuzima zivuga ko imirire myiza ishingiye ku gutegura indyo yuzuye igomba kubonekamo intungamubiri umubiri ukeneye, hakabonekamo ibyubaka umubiri bikomoka ku matungo (inyama, amagi, indagara, amafi, amata) n’ibinyamisogwe (ibishyimbo, soya, ubunyobwa).

Habonekamo ibitera imbaraga biri mu byiciro bitatu; ibinyabijumba (ibijumba, ibirayi, amateke, ibitoki,…), ibinyampeke (ibigori, amasaka, ingano,…) n’amavuta kuko arimo intungamubiri zongerera umubiri imbaraga, akanorohereza umubiri gukurura intungamubiri umuntu afata mu mafunguro. Hari kandi ibirinda indwara; imboga (dodo, amashu, karoti, inyanya, intoryi, ibitunguru,…) n’imbuto (avoka, imineke, ibinyomoro, …).

Umuyobozi w’Akarere ka Nyamagabe wungirije ushinzwe Iterambere ry’Ubukungu Habimana Thadée
Uwonkunda Irène Umuyobozi w’Ishami ry’imirire n’isuku muri NCD
Sangiza abandi iyi nkuru
Ibitekerezo 1
Mbarushimana damascene

Ibibi bintu byaribyiza cyane Kandi ubutumwa n’amasomo bahakuye nizereko bazayakurikiza maze Nyamagabe hehe nokubura amaraso

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27