Nyagatare: Inzego zinyuranye zirashaka umuti ku kibazo cy’ihohoterwa

Nyagatare: Inzego zinyuranye zirashaka umuti ku kibazo cy’ihohoterwa
Umugenzuzi Mukuru w’Uburinganire Rwabuhihi Rose

Abahagarariye inzego zinyuranye zirimo iz’ibanze, iz’umutekano, Sosiyete Sivile n’imiryango ishamikiye ku madini, bari mu biganiro by’iminsi ibiri bigamije gushaka umuti ku kibazo cy’ihohoterwa rishingiye ku gitsina by’umwihariko irikorerwa abana gikomeje kugaragara mu Karere ka Nyagatare.

Ni ibiganiro byateguwe n’Urwego rw’Igihugu Rushinzwe Kugenzura Iyubahirizwa ry’Ihame ry’Uburinganire n’Ubwuzuzanye bw’Abagore n’abagabo mu Iterambere ry’Igihugu (GMO) ku bufatanye n’Akarere ka Nyagatare.

Hagaragajwe ko ikibazo cy’amakimbirane mu miryango ari intandaro y’ihohoterwa rikorerwa abana ndetse n’ibindi bibazo bikibangamiye umuryango.

Umuyobozi w’Akarere ka Nyagatare Gasana Stephen yagize ati: “… ikibazo cyo gusambanya abana no gutera inda abangavu na cyo gishamikiye ku kibazo cy’amakimbirane mu miryango, nidushobora kugikemura n’ibindi bibazo bizagabanyuka birimo ibyo gutera inda abangavu”.

Yongeyeho  ati: “Mu isesengura twakoze twasanze amakimbirane mu miryango atera ingaruka ku burere bw’abana bikabaviramo ubuzererezi, kunywa ibiyobyabwenge…. ndetse aya makimbirane akanatera ubukene mu miryango”.

Gasana Stephen yakomeje avuga ko ku bufatanye n’abafatanyabikorwa batandukanye bakoze  ubukangurambaga mu miryango ibanye mu makimbirane bituma  igera ku 150 iva mu makimbirane yiyemeza kubana neza.

Umunyamabanga Nshingwabikorwa w’Intara y’Iburasirazuba Dr. Nyirahabimana Jeanne yavuze ko ihohoterwa ridakwiye gucecekwa mu gihe hari uwahohotewe kuko ari iyo ntambwe yo kurirandura.

Ati: “Igihe hagize uhohoterwa ntibikwiye gucecekwa cyangwa kuzimya ibimenyetso kuko ni icyaha.”.

Yakomeje agaragaza  ko umuryango ari wo shingiro ry’Igihugu, bityo ari ngombwa ko ihame ry’uburinganire ryimakwazwa ndetse n’amategeko arengera umuryango akamenyekana mu kubaka umuryango ushoboye kandi utekanye.

Ati: “Umuryango ni wo shingiro ry’Igihugu n’iterambere ry’Igihugu cyacu. Birakwiye ko ihame ry’uburinganire n’amategeko arengera abagize umuryango bimenywa mu miryango nk’uko biri kugira ngo twubake imiryango izira amakimbirane, itekanye kandi ishoboye”.

Umugenzuzi Mukuru w’Uburinganire  Rwabuhihi Rose yibukije abayobozi ko nta terambere ryagerwaho umuryango udatekanye.

Yabasabye gukumira ihohotera rishingiye ku gitsina, by’umwihariko gukumira gusambanya abana; abasaba gutangira amakuru ku gihe kugira ngo uwakoze icyaha ahanwe.

Abayobozi b’inzego z’ibanze biyemeje gutangira amakuru ku gihe, kwigisha imiryango hagamijwe gukumira amakimbirane mu ngo no guharanira ko aho bayobora abagabo n’abagore bahabwa amahirwe angaha mu bikorwa by’iterambere.

Umuyobozi w’Akarere ka Nyagatare Gasana Stephen
Hakinwe umukino ukangurira abayobozi mu nzego z’ibanze kwimakaza ihame ry’uburinganire no gukumira ihohotera rishingiye ku gitsina
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27