Nyagatare: Hamenwe litiro 7,000 z’inzoga zitujuje ubuziranenge

Ubuyobozi bw’Akarere ka Nyagatare ku bufatanye n’inzego z’umutekano ku wa Gatanu tariki 8 Gicurasi 2026, bayoboye igikorwa cyo kumena litiro ibihumbi 7 zengwaga mu buryo butubahiriza ubuziranenge, bikagira ingaruka ku buzima bw’abantu.

Iki gikorwa cyabereye mu Murenge wa Musheri Akagali ka Ntoma Umudugudu w’Urukundo, aho Ubuyobozi bw’Akarere ka Nyagatare bwagaragaje ko raporo y’Ikigo cy’Igihugu gishinzwe ubuziranenge bw’Imiti n’Ibiribwa (FDA) yavuye mu bugenzuzi bwakorewe inganda zenga ibinyobwa bitandukanye igaragaza ko hari abakora ibitujuje ubuziranenge.

Inzoga zamenwe zabikwaga mu bikoresho bya pulasitiki, mu gihe ibi bibujijwe kubikwamo cyangwa gutarwamo ibinyobwa nk’inzoga. Umuyobozi w’Akarere ka Nyagatare wungirije Ushinzwe Imibereho Myiza y’Abaturage, Murekatete Juliet yasabye abashaka kungukira mu gukora ibinyobwa bigira ingaruka ku buzima by’abaturage kubireka.

Ati: “Abakora izi nzoga babura ubunyangamugayo kuko baba baragaragarijwe ibisabwa ngo utunganye ibinyobwa bitagira ingaruka ku buzima. Iyo bagurishije ibitujuje ubuziranenge rero baba bitaye ku nyungu binjiza kuruta ingaruka bigira ku babikoresha, ari yo mpamvu twafashe icyemezo cyo gufunga uruganda no kumena ibirimo. Turabasaba kubihagarika abazi ko bakibikora.”

Uwo muyobozi yakomeje asaba abaturage kumenya ko bakwiye kugira amakenga y’ibinyobwa banywa kugira ngo badashyira ubuzima bwabo mu kaga. Ati: “Turasaba abaturage kudakoresha ibi binyobwa kuko byabangiza. Yewe n’uwakumva atameze neza azi ko yakunze kubikoresha yakwegera inzego z’ubuvuzi bakareba niba nta ngaruka byamugizeho. Ikindi ni uko dukomeza gufatanya dutanga amakuru ku bandi baba bakora ibinyobwa muri ubu buryo.”

Abaturage ba Musheri bagaragaje ko ibi binyobwa babinywaga cyane, gusa bashima ko mu gihe hari ibyangiza bigaragayemo bafashe icyemezo cyo kubihagarika. Rukimirana Gad yagize ati: “Izi nzoga nanjye nazinywaga ndetse kenshi. Twabuzwaga kunywa ibinyobwa bisanzwe byengwa mu buryo bwa gakondo, tukabwirwa ko ibinyujijwe mu ruganda ari byo byujuje ubuziranenge. Kuba rero na byo byarasanzwemo ibibazo turabireka ntabwo twakwiyahura twamenye amakuru.”

Mukimbiri Aimable na we avuga ko izi nzoga zacuruzwaga ahantu henshi uretse ko kuba zabaga ziri mu macupa afunze batari bazi aho zikorerwa uko hameze. Ati: “Iyo inzoga igeze ku isoko umukiriya ntabwo aba azi aho ikorerwa uko byifashe. Twabonye bazibikaga mu bigunguru bya pulasitiki kandi ngo bitemewe. Turashima ubuyobozi buhatubera bugakurikirana uko ibintu bikoreshwa n’abaturage bitunganywa ahari amakosa bakabihagarika.”

Muri rusange muri uru ruganda hasanzwe inzoga zitaze mu bikoresho bya pulasitiki bipima litiro ibihumbi 7, bifite agaciro k’asaga miliyoni 6 z’amafaranga y’u Rwanda zose zikaba zamenwe.