Nyagatare: Barifuza ikimenyetso cy’amateka ku bari abakozi muri aka karere bazize Jenoside

Nyagatare: Barifuza ikimenyetso cy’amateka ku bari abakozi muri aka karere bazize Jenoside

Ubuyobozi bw’umuryango IBUKA uharanira inyungu z’Abarokotse Jenoside yakorewe Abatutsi na bamwe mu bayirokotse basabye ko ku biro by’Akarere ka Nyagatare hashyirwa ikimenyetso cy’amateka kigaragaza abari abakozi muri aka Karere bishwe muri Jenoside yakorewe Abatutsi mu 1994.

Umuyobozi wa IBUKA, Bigenimana Jean de Dieu yabigarutseho ubwo hibukwaga abahoze ari abakozi mu byari Amakomini yahujwe akabyara Akarere ka Nyagatare ari yo Muvumba, Ngarama na Kiyombe. Bigenimana avuga ko amazina amaze kumenyekana, yakubakirwa ikimenyetso akandikwaho kugira ngo bakomeze kuzirikanwa na bagenzi babo bakora mu ngeri zitandukanye muri aka karere.

Yagize ati: “Mu gihe nk’iki twibuka ku nshuro ya 32 abari abakozi bishwe muri Jenoside yakorewe Abatutsi mu 1994, tuzirikana ubwitange n’umurava wabo bari bafite mu gukorera igihugu. Turasaba ko aho ubuyobozi bukorera hazashyirwa ikimenyetso kiranga amateka y’abakozi twabuze bazira uko bavutse, kugira ngo dukomeze kubazirikana no kubibuka no kubaha agaciro bambuwe.”

Akomeza agira ati: “Ikimenyetso kiriho amazina yabo kivuze byinshi kuri twe ndetse kizanafasha abagana Akarere ndetse n’abagakoreramo umunsi ku munsi gukomeza kuzirikana aya mateka.”

Umwe mu bari abakozi warokokeye mu Karere ka Nyagatare Gatete Gatera Sylvere avuga ko kubona ikimenyetso kigaragaza amateka y’abo bakoranaga ari ubundi buryo bwo kubibuka. Ati: “Bagenzi banjye twakoranaga twanyuranye muri Jenoside yakorewe Abatutsi mu 1994 bamwe babadukuramo baricwa. Buri mwaka turabibuka ariko nanone twagiye tugira icyifuzo ko amazina yabo yashyirwa ahari Ibiro by’Akarere kugira ngo yaba twe dukomeze kubazirikana ariko n’abahagenda n’abahakora byabafasha kujya bazirikana amateka twabayemo.”

Umuyobozi w’Akarere ka Nyagatare Kakooza Henry yijeje ubuyobozi bwa IBUKA ko bagiye gufatanya kureba uko iki cyifuzo cyashyirwa mu bikorwa ku buryo mu kwibuka umwaka utaha byazaba byarakozwe. Ati: “Tugiye kubishyira mu bikorwa byacu by’ingengo y’imari uyu mwaka kugira ngo ubwo tuzaba twibuka ku nshuro ya 33 bizabe byarakozwe. Ntabwo ari ibintu bihenze kandi ubona ko no mu bigo bitandukanye koko usanga haragiye hashyirwa ibimenyetso bigaragaza abakozi babyo bishwe muri Jenoside yakorewe Abatutsi mu 1994, kandi ni kimwe bikorwa bifasha mu kwibuka no kubazirikana.”

IBUKA mu Karere ka Nyagatare igaragaza ko hamaze kumenyekana abari abakozi muri aka Karere bishwe muri Jenoside yakorwe Abatutsi mu 1994 bagera ku 8. Harimo abari abarimu, abaganga ndetse n’abakoraga mu buhinzi n’ubworozi.

Umuyobozi wa IBUKA mu Karere ka Nyagatare yasabye ko hashyirwa ikimenyetso cy’amateka kigaragaza abakozi bishwe muri Jenoside yakorewe Abatutsi mu 1994
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27