Musanze: Mugara bamaze imyaka ine bategereje umuriro w’amashanyarazi

Musanze: Mugara bamaze imyaka ine bategereje umuriro w’amashanyarazi

Abaturage bo mu Mudugudu wa Mugara, Akagari ka Kigombe, Umurenge wa Muhoza mu Karere ka Musanze, bamaze imyaka ine bategereje umuriro w’amashanyarazi, babajwe nuko iterambere ryabo ryihutirwa rikomeje kudindira.

Nyamara, nubwo hashyizweho amapoto y’amashanyarazi nk’ikimenyetso cyo gutangira kugezwaho umuriro, kugeza ubu umuriro nturabageraho. Ibyo byatumye abaturage basigarana gusa amatara  n’agatoroshi k’amabuye, ndetse  umutekano wabo ukaba muke  mu gihe cy’umwijima, kuko ngo hari insoresore zitwikira ijoro zikabambura utwabo.

Nzigira Faustin, umwe mu baturage, ashimangira ko aho kugira ngo umuriro ugerweho, bahuye n’inzitizi nyinshi

Yagize ati: “Twashyizeho amapoto yacu, ariko REG ikaza ikatubwira ko ayabo ariyo agomba gukoreshwa. Nubwo amapoto yagiye ashyirwaho inshuro nyinshi, imyaka ine irashize umuriro nturagera hano.”

Dusabemariya Josiane avuga ko kubura umuriro bituma abana batabasha kwiga nijoro kandi bikongera ibyago byo guhura n’ibibazo by’umutekano.

Ati: “Abana bacu ntibashobora gusubira mu masomo kuko nta muriro ubafasha kwiga nijoro. Telefone tujya gucaginga kure, kandi bigorana kugera ku muriro.”

Nsengimana Silidio avuga ko kwifashisha ibikoresho nk’amabuye ya radiyo, peteroli yo gushyira mu dutadowa bigoye kubera ibiciro byazamutse cyane.


Yagize ati: “Amabuye ya radiyo na peteroli byo gushyira mu dutadowa byahenze, ndetse televiziyo ntituyibona nk’iby’ibanze kuko tutayifite ntawayigura adafite amashanyarazi.”

Batanga Regis, ukuriye REG ishami rya Musanze, yemeza ko ikibazo kizwi neza kandi ko ibikorwa byo gutanga umuriro ku Mudugudu wa Mugara bizarangira mu kwezi kwa Kamena 2025.


Ati: “Hari imbogamizi z’ibikoresho byatumye umuriro utagera ku baturage, ariko turimo kubikemura. Turizeza abaturage ko muri Kamena 2025 bazaba bafite umuriro.”

Abaturage bifuza ko bagezwaho umuriro w’amashanyarazi uzabafasha kwiteza imbere no guhindura imibereho yabo.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27