Muhanga: Bisi yagonze umunyonzi n’uwo yakuraga ku igare barapfa

Muhanga: Bisi yagonze umunyonzi n’uwo yakuraga ku igare barapfa

Imodoka itwara abagenzi mu buryo bwa rusange ya Sosiyete ya Kivu Belt, yagonze umunyonzi n’umugenzi yakuraga ku igare bombi bahita bitaba Imana nyuma yo kubaca hejuru. 

Ni impanuka yabereye ahitwa mu Ruvumera, mu Kagari ka Gahogo, Umurenge wa Nyamabuye, Akarere ka Muhanga kuri uyu wa Mbere tariki ya 30 Werurwe 2026. 

Iyo modoka yo mu bwoko bwa Coaster yari itwaye abagenzi ibavanye mu Burengerazuba, irenze ahitwa i Nyabisindu ikomeza mu muhanda wa Ruvumera ari na ho yasanze abo bantu babiri bahagaze mu mpande z’umuhanda.

Abari aho impanuka yabereye bemeza ko imodoka yabagonze ibaturutse inyuma ikabaca hejuru, bagahita bitaba Imana. 

Iradukunda Serge, ucururiza hafi y’aho byabereye, yavuze ko impanuka ishobora kuba yatewe n’uko umushoferi yarangaye. 

Yagize ati: “Twabonye imodoka ibaturutse inyuma ibagonga itagabanyije umuvuduko ihita ibanyuraho irakomereza, byagaragaraga nk’aho umushoferi atari yababonye kuko iyo aza kubabona ntiyari kubagonga atyo.”

Yakomeje avuga ko abagenzi bari muri iyo modoka bavugaga ko uwo mushoferi yari yahereye kare atwara nabi, ndetse bakaba bari banatangiye kumwitotombera.

Umuvugizi wa Polisi mu Ntara y’Amajyepfo CIP Hassan Kamanzi, yemeje iby’iyi mpanuka, avuga ko bakimara kumenya amakuru bihutiye gutabara.

Yagize ati: “Abagizweho ingaruka n’iyi mpanuka bahise bitaba Imana, imirambo yabo yajyanywe mu buruhukiro bw’Ibitaro bya Kabgayi, naho iperereza rikaba ryatangiye, ubu umushoferi n’imodoka bifungiye kuri Sitasiyo ya Polisi ya Nyamabuye.”

Polisi yongeye kwibutsa abakoresha umuhanda by’umwihariko abatwara ibinyabiziga, kurushaho kwitwararika no kugabanya umuvuduko, kuko amakosa mato ashobora guteza impanuka zikomeye zinatwara ubuzima bw’abantu.

Abaturage bari gusukura ahabereye impanuka
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27