Iburengerazuba: Abakoresha umuhanda baributswa kwirinda icyateza impanuka

Iburengerazuba: Abakoresha umuhanda  baributswa kwirinda icyateza impanuka

Kuri uyu wa Kabiri tariki ya 22 Ukwakira, Polisi y’u Rwanda yakomeje gahunda y’ubukangurambaga bw’umutekano wo mu muhanda ‘Gerayo Amahoro’ mu Ntara y’Iburengerazuba.

Ni ubukangurambaga bukubiyemo ubutumwa bwo kwibutsa abakoresha umuhanda mu byiciro byombi, kwitwararika birinda uburangare n’amakosa ayo ari yo yose ashobora kuba intandaro y’impanuka zigahitana ubuzima bw’abantu, zikagira uwo zikomeretsa cyangwa zikangiza imitungo n’ibikorwaremezo rusange.

Hatanzwe ubutumwa mu turere dutandukanye two muri iyi ntara, ari two; Rubavu, Karongi, Rutsiro na Ngororero, hibandwa ku batwara amapikipiki n’abanyeshuri bo mu bigo bitandukanye byo muri utu turere.

Umuryango Mpuzamahanga wita ku buzima (OMS), ugaragaza ko impanuka zo mu muhanda zikomeje kuza imbere mu bitwara ubuzima bw’abantu benshi ku isi, aho mu mwaka ushize wa 2023, abantu miliyoni 1.19 bahitanywe n’impanuka zo mu muhanda.

OMS kandi yagaragaje ko abanyamaguru, abanyamagare n’abatwara moto, ari bo bahura n’ibyago byinshi byo kwibasirwa n’impanuka zihitana ubuzima.

Muri uwo mwaka mu Rwanda, impanuka zo mu muhanda zigera kuri 700 zahitanye ubuzima bw’abiganjemo abanyamaguru, abatwara amagare n’abatwara moto.

Mu butumwa bagejejweho, abanyeshuri bibukijwe kugendera ibumoso bw’umuhanda aho bareba ibinyabiziga bibaturuka imbere, kwambukira ahari imirongo yera izwi nka ‘Zebra Crossing’ babanje kwitegereza iburyo n’ibumoso ko nta kinyabiziga kiri hafi, bibutswa no kudakinira mu muhanda cyangwa kurira ibinyabiziga bigenda kuko byabateza impanuka bakaba bahatakariza ubuzima.

Abatwara moto basabwe kwirinda gutwara banyoye ibisindisha, kwirinda gutwara abagenzi barenze umwe, kudahisha cyangwa ngo bahindure imibare n’inyuguti bigize nimero iranga ikinyabiziga (Plaque), kwirinda kugendera ku muvuduko urenze uwagenwe n’andi makosa ashobora guteza impanuka zo mu muhanda.

RNP

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27