Angola: Batanu bapfuye, abasaga 1200 batabwa muri yombi bazira kwigaragambya 

Angola: Batanu bapfuye, abasaga 1200 batabwa muri yombi bazira kwigaragambya 

Polisi ya Angola yatangaje ko abantu batanu barimo n’umupolisi bishwe, abarenga 1 200 batabwa muri yombi nyuma y’imyigaragambyo yamagana izamuka ry’ibikomoka kuri peteroli yabereye mu murwa mukuru, Luanda.

Iyo myigaragambyo yatangiye ku munsi wa Gatatu  itangijwe n’abatwara imodoka zitwara abagenzi ku wa 28 Nyakanga bamagana izamuka ry’ibiciro bya lisansi  ariko uko iminsi igenda  ikurikirana imyigaragambyo irushaho gufata indi ntera.

Ku wa Mbere w’iki cyumweru abantu barenga ibihumbi bigabije imihanda i Luanda, bafunga inzira, basahura amaduka, bangiza imodoka ndetse habaho imirwano hagati y’abigaragambya n’inzego z’umutekano.

Polisi yatangaje ko habaye igeragezwa ry’imyigaragambyo no gusahura mu Ntara za Icolo e Bengo na Huambo ariko iza guhoshwa.

Imyigaragambyo yakomereje  i Luanda ku wa Kabiri, aho hongeye kuba imvururu hagati y’abigaragambya na Polisi ndetse n’izindi nzu z’ubucuruzi zirasahurwa.

BBC yatangaje ko hari amakuru avuga ko habayeho urusaku rw’amasasu mu bice bitandukanye by’umurwa mukuru.

Bamwe mu bakora mu miryango itari iya Leta bavuga ko ibibazo by’ibiciro byatumbagiye by’ibikomoka kuri lisansi ari byo byarakaje abaturage ndetse biteza inzara no kurushaho kujya mu bukene bukabije.

Icyemezo Leta iherutse gufata cyo kongera igiciro cya lisansi yo mu bwoko bwa diesel hejuru ya 33%,  ni cyo bavuga ko cyabaye intandaro ya byose, aho byatumye ibiciro byo gutwara abantu mu mijyi bizamuka, ibiribwa n’ibindi bikoresho by’ibanze.

Perezida w’icyo gihugu João Lourenço yahakanye ibyo bibazo, avuga ko abigaragambya bari kwitwaza ikibazo cy’ibiciro bya lisansi nk’impamvu yo gushaka guhungabanya ubutegetsi.

Hagati aho ibinyamakuru bya Leta muri Angola byibasiwe bikomeye ku mbuga nkoranyambaga kubera gukomeza gahunda zisanzwe ntibyite ku gutangaza ibyerekeye imyigaragambyo iri kuba.

Imyigaragambyo yamagana izamuka ry’ibiciro muri Angola yaguyemo batanu
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27