Abahagarariye inyungu za gisirikare mu Rwanda basobanuriwe ibikorwa bya RDF mu Karere

Abahagarariye inyungu za gisirikare mu Rwanda basobanuriwe ibikorwa bya RDF mu Karere

Abahagarariye inyungu za gisirikare z’ibihugu byabo mu Rwanda, ku wa Gatatu taliki ya 13 Nyakanga bahawe amakuru ku bijyanye n’umutekano mu nama yabahurije ku cyicaro Gikuru cy’Ingabo z’u Rwanda (RDF) ku Kimihurura mu Karere ka Gasabo.

Basobanuriwe imiterere n’imikorere ya RDF, harimo n’uruhare izo ngabo zigira mu bufatanye n’ubutwererane bw’ibihugu ndetse n’imiryango mpuzamahanga hashingiwe ku ngero zirimo urw’ibikorwa byo kubungabunga amahoro muri Mozambique na Repubulika ya Santarafurika (CAR).

Amakuru bahawe akubiyemo ibisobanuro byimbitse ku miterere y’umutekano imbere mu gihugu ndetse n’uko bihagaze mu Karere aho u Rwanda rwohereza ingabo mu butumwa bw’amahoro binyuze mu bufatanye bw’ibihugu cyangwa mu butumwa bw’Umuryango w’Abimbubye.

Iyo nama yateguwe n’Ubuyobozi bw’Ishami ry’Ingabo z’u Rwanda rishinzwe Ububanyi n’Amahanga mu bya gisirikare yahuje 17 bahagarariye inyungu z’ibihugu byabo mu bya gisirikare.

Umuyobozi w’Ishami rishinzwe Ubutwererane Mpuzamahanga mu bya gisirikare muri RDF Brig Gen Patrick Karuretwa, yavuze ko ibyo biganiro ku mutekano wo mu Rwanda no mu Karere byari ibyubaka.

Yagize ati: “Byari ibiganiro by’ingirakamaro kandi byatanze umusaruro aho byari bigamije kurushaho kwagura ubushobozi bw’Ingabo z’u Rwanda mu gukurikirana inyungu z’Igihugu n’ibyingenzi mu rwego rwo kurinda umutekano binyuze mu butwererane buzima n’ubufatanye nyabwo.”

Col Kelius Mwadime, uhagarariye inyungu mu bya gisirikare za Kenya mu Rwanda, yavuze ko ibyo biganiro bagize byari ingirakamaro kuko byagaragaje ko u Rwanda ruha agaciro Umuryango Mpuzamahanga by’umwihariko abahagarariye inyungu z’ibihugu byabo mu bya gisiriakare, rubamenyesha imiterere y’umutekano mu Gihugu no mu Karere.

Nyuma y’ibyo biganiro, Abahagarariye inyungu z’ibihugu byabo mu bya gisirikare basuye Ibitaro Bikuru bya Gisirikare biherereye i Kanombe aho basobanuriwe serivisi zose zihatangirwa harimo n’ubuvuzi bwa Kanseri butangirwa muri icyo kigo cyihariye ku Buvuzi bwa Kanseri yafunguwe mu 2020.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27