Kwibuka 30: Urubyiruko rwakoze mu nganzo rufasha Abanyarwanda kwibuka biyubaka

Kwibuka 30: Urubyiruko rwakoze mu nganzo rufasha Abanyarwanda kwibuka biyubaka

Buri tariki 7 Mata buri mwaka, u Rwanda n’inshuti zarwo bibuka inzirakarengane zazize Jenoside yakorewe Abatutsi mu 1994,  iki Cyumweru hakaba hatangijwe igikorwa cyo kwibuka ku nshuro ya 30 Jenoside yakorewe Abatutsi mu 1994.

Ni umuhango witabiriwe n’abashyitsi batandukanye bavuye mu bihugu bitandukanye bifitanye ubushut n’u Rwanda aho ibyinshi byanagize uruhare ntagereranywa mu kongera kwiyubaka mu myaka 30 ishize.  

Uretse imbwirwaruhame n’ubuhamya byatambutse muri iki gikorwa, hari n’abahanzi batandukanye bagiye basimburana mu ndirimbo zo kwibuka no gukomeza Abanyarwanda.

Imvaho Nshya yabateguriye uko ibihangano byasimburanywe muri icyo gikorwa ndetse n’ubutumwa byatangaga.

Mu bahanzi bahumurije u Rwanda n’Abanyarwanda harimo Alyn Sano na Nely Ngabo mu ndirimbo yitwa  Batuye Imitima Tugutuye, imaze imyaka ine igiye ahagaragara,  ikubiyemo amagambo ahumuriza u Rwanda, avuga ko nubwo abana barwo rwavukijwe batagaruka ukundi ariko batuye mu mitima y’abarutuye.

Mirasano na Bukuru baririmbye indirimbo Ibuka Ntuzibagirwe na Gato ya Nyiranyamibwa Suzana ndetse na Ihorere Rwanda ya Masamba Intore, yafatanyije n’abahanzi  batandukanye, izo ndirimbo zombi zitanga icyizere ko Jenoside itazongera kubaho ukundi, kandi ko imbere heza hategereje u Rwanda n’Abanyarwanda.

Abarimo Alyne Sano, Nel Ngabo, Mani Martin na Ruti Joel basubiyemo indirimbo ya Rugamba Sipiriyani yitwa Urukundo, izwi nka “Murumve Twana Twanjye”, mu rwego rwo kwibutsa Abanyarwanda ko urukundo ari wo murage bagomba kubakiraho mu guhashya umwanzi.

Urubyiruko rutandukanye rw’ababyinnyi bagaragaje umukino werekana uko Jenoside yakorewe Abatutsi yakozwe, ndetse n’uko ubuzima bwo kwiyubaka mu myaka 30 ishize bwagenze, bagaragaza ko ubu mu gihugu hari amahoro kandi Abanyarwanda bakataje mu iterambere.

Mu gusoza, Umuvugizi wa Guverinoma wungirije Alain Mukuralinda yashimiye abitabiriye n’abahanzi muri rusange, avuga ko kuba abahanzi bagaragaje uruhare rwabo ari icyemeza ko ubuzima bwagarutse mu gihugu.

Icyumweru cyo kwibuka cyatangijwe hacyanwa urumuri rw’icyizere, igikorwa cyakomereje kuri BK Arena ahari hateraniye abashyitsi baturutse hirya no hino mu bihugu by’inshuti z’u Rwanda baje kwifatanya n’Abanyarwanda Kwibuka ku nshuro ya 30 Jenoside yakorewe Abatutsi mu 1994.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27