Burera: Abakora ubwikorezi n’abarobyi barasabwa kwirinda impanuka zo mu mazi

Burera: Abakora ubwikorezi n’abarobyi barasabwa kwirinda impanuka zo mu mazi

Polisi y’u Rwanda yasabye abakorera mu biyaga bya Burera na Ruhondo barimo abakora umwuga wo gutwara abantu n’ibintu mu mazi ndetse n’abakora uburobyi kwirinda impanuka zo mu mazi.

Ni ibyagarutsweho na Polisi y’u Rwanda, Ishami rishinzwe umutekano wo mu mazi, (Marine Unit), n’abagize amakoperative atwara abantu n’ibintu n’ay’uburobyi mu Mirenge ya Kinoni na Kagogo yo mu Karere ka Burera.

Urubuga rwa Polisi y’u Rwanda rwatangaje ko Umuyobozi w’Ishami rya Polisi rishinzwe umutekano wo mu mazi, Assistant Commissioner of Police (ACP) Elias Mwesigye, yibukije abakora ako kazi gukora kinyamwuga birinda  impanuka.

Yagize ati: “Hari ibyo mugomba kwirinda igihe mutwaye abantu kugira ngo bitabateza impanuka nko gutwarana abantu n’imizigo, kubatwara batambaye umwambaro wabugenewe (life jacket), no gupakira ibirenze ubushobozi bw’ubwato kandi mugatwara ubwato ari uko mufite ubwishingizi n’uruhushya rubemerera gutwara abantu.”

ACP Mwesigye yabasabye kujya bigenzura bakareba abadakurikiza amabwiriza n’amategeko abagenga ndetse n’abiyitirira umwuga wabo bataba mu makoperative kuko bakora amakosa akabitirirwa, ahubwo bagatanga amakuru.

Umuyobozi w’Akarere ka Burera, Mukamana Soline, yasabye amakoperative y’uburobyi n’ubwikorezi bwo mu mazi kwirinda kuyajyamo mu buryo bunyuranyije n’amategeko kuko bituma ubuzima bwa benshi buhatikirira.

Ati: “Muzi ko amazi ajya atwara ubuzima bw’abantu, akenshi ugasanga biturutse ku baba bayagiyemo mu buryo bunyuranyije n’amategeko. Kugira ngo hirindwe impanuka za hato na hato, turabasaba kubahiriza amategeko n’amabwiriza agenga umwuga wanyu.”

Mu mezi atatu ya mbere ya 2024 mu biyaga bya Burera na Ruhondo habereyemo impanuka 2 zahitanye ubuzima bw’abantu 12.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27