Abadipolomate babiri b’Abanyamerika birukanywe na Esipanye mu ibanga

Abadipolomate babiri b’Abanyamerika birukanywe na Esipanye mu ibanga

Espanye yirukanye mu ibanga Abadipolomate babiri b’Abanyamerika ibarega ibikorwa byo kuyineka.

Ibitangazamakuru n’ibigo ntaramakuru bitandukanye byasohoye iyi nkuru ejo ku wa Kane, bisobanura ko intandaro ari abofisiye babiri b’inzego z’ubutasi z’igisirikare bafashwe barimo kwiba amabanga.

Bashinjwa ko bayahaga Amerika, bayanyujije ku badipolomate babiri b’Ambasade ya Leta zunze ubumwe z’Amerika i Madrid, Umurwa mukuru wa Esipanye, na bo babahaga amafaranga atubutse.

Hashize amezi abiri batawe muri yombi ariko urukiko rwari rwategetse ko iyi nkuru itajya ku karubanda.

Nyamara ngo ku wa Kabiri w’iki cyumweru abanyamakuru babibajijeho Minisitiri w’intebe Pedro Sanchez.

Yirinze kubivugaho byinshi, yemera gusa ko byateye agatotsi hagati y’ibihugu byombi, maze avuga ko ikibazo cyarangiye.

Minisitiri w’ingabo za Esipanye, Margarita Robles, na mugenzi we w’ububanyi n’amahanga, Jose Manuel Albares, umwe ukwe undi ukwe, batumije Ambasaderi w’Amerika i Madrid, Julissa Reynoso, bamusaba ibisobanuro.

Ibitangazamakuru byemeza ko yabashubije ko ntacyo abiziho ariko ngo asaba imbabazi. Bamusabye ko igihugu cye gicyura abo badipolomate babiri kandi koko ngo Amerika yarabikoze.

Ibitangazamakuru ntibivuga amazina yabo n’inzego zabo z’akazi.

Bisobanura ko ari inkuru itangaje cyane kandi idasanzwe kuko Leta zunze ubumwe z’Amerika na Espanye bombi ari abanywanyi muri OTAN, umuryango wa gisirikare w’ibihugu bituriye amajyaruguru y’inyanja y’Atlantika.

Ibihugu byombi kandi bifite umuco wo gusangira amakuru y’ubutasi nk’uko byatangajwe n’Ibiro ntaramakuru by’Abafaransa n’u Bwongereza.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27