Kigali: Ibihugu 36 bihagarariwe mu nama yiga ku birango by’ubuziranenge

Kigali: Ibihugu 36 bihagarariwe mu nama yiga ku birango by’ubuziranenge

Guhera kuri uyu wa Mbere taliki ya 09 Ukwakira kugeza ku wa Gatanu tariki ya 13 Ukwakira 2023, u Rwanda rwakiriye inama mpuzamahanga yiga ku birango by’ubuziranenge.

Iyi ni inama ihurije hamwe impuguke 80  ziturutse mu bihugu 36 byo hirya no hino ku Isi zihuriye mu Muryango mpuzamahanga w’Ubuziranenge (ISO), bakaba bagiye kumara icyumweru  biga ku mabwiriza y’ubuziranenge  yibanda ku bwiza bwa  serivisi mu nzego zose.

Ikigo cy’Igihugu Gitsura Ubuziranenge (RSB) cyatangaje ko iyi nama ibaye ku nshuro ya 40, yitezweho kuzagirira u Rwanda akamaro kuko izi mpuguke z’ubuziranenge zigiye kuganira kugira ngo habeho guteza imbere ibikorwa byujuje ubuziranenge.

Murenzi Raymond, Umuyobozi Mukuru w’Ikigo cy’Igihugu gitsura Ubuziranenge (RSB), yavuze ko kuba u Rwanda ruri mu nzira nziza yo kwimakaza ubuziranenge mu nzego zose ari n’umwanya mwiza wo kwakira iyi nama, aho inganda z’u Rwanda zizasurwa n’impuguke zizabagira inama z’uburyo bakora barushaho kubahiriza ubuziranenge.

Ati: “Iyi nama mpuzamahanga y’impuguke zikora ibirango by’ubuziranenge, ubuzinenge bw’ubwiza buba hose haba mu by’ubukerarugendo haba mu by’inganda mujya mubibona ko inganda zohereza ibicuruzwa hirya no hino ku Isi, zigomba kuba zifite amabwiriza y’ubuziranenge zigenderaho kandi zujuje, izi mpuguke rero ziga kuri ibyo ngibyo zigashyiraho ibisabwa kugira igicuruzwa kiva mu cyiciro kimwe kijya mu kindi haba mu bijyanye n’ubukerarugendo ndetse na servisi zitangwa na za banki.”

Yakomeje agira ati: “U Rwanda rurunguka ubunararibonye, ikindi gikomeye ni uko inganda zacu zigira kuri izi mpuguke bazisura bakababwira ibyo bakeneye kuzamura byimakaza ubuziranenge, kugira ngo bagere ku masoko atandukanye ari hirya no hino ku Isi.”

RSB ivuga ko u Rwanda ruri mu rugendo rwiza kuko ubu hishimirwa ko ibigo bigera kuri 30 bifite ibyemezo by’ubuziranenge mpuzamahanga (IS0 001).

Kugeza ubu mu bihugu bitandatu by’Afurika y’Iburasirazuba hari ibirango by’ubuziranenge 207, RSB ikaba ishishikariza abacuruzi kwandikisha no guharanira ko ibicuruzwa byabo byaba byujuje ubuziranenge mpuzamahanga kuko bigirirwa icyizere gikomeye ku masoko mpuzamahanga.

ZIGAMA THEONESTE

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27