Imvura yishe abantu 11 isenya inzu 335 mu minsi 15

Imvura yishe abantu 11 isenya inzu 335 mu minsi 15

Minisiteri Ishinzwe Ibikorwa by’Ubutabazi, MINEMA, irashishikariza abaturarwanda kwirinda ibiza biterwa n’imvura irimo kugwa muri iki gihe cy’itumba. 

Ni mu gihe kandi yatangaje ibimaze kwangizwa n’imvura, aho abantu 11 bahitanwe n’imvura, mu gihe abantu 48 bakomerekejwe nayo. 

Inzu 335 zasenywe n’imvura, inyubako 2 z’ubuyobozi zirasenyuka,  yangiza amateme 8, isenya amashuri 19, urusengero 1 n’uruganda rumwe. 

Uturere twibasiwe kurusha utundi harimo Akarere ka Gakenke ķo mu Ntara y’Amajyarugu kapfuyemo abantu 2 bishwe n’imvura n’aka Kayonza ko mu ntara y’Iburasirazuba nako kapfuyemo abantu 2.

Inzu hafi 200 zarasenyutse mu Karere ka Rubavu, mu gihe inzu 40 mu Karere ka Nyagatare zasenyutse. Mu Karere ka Gicumbi na Nyanza hasenyutse inzu 12 muri buri Karere. 

Mu Karere ka Gatsibo mu Ntara y’Iburasirazuba hamaze gupfa inka 4 zishwe n’ibiza bikomoka ku mvura, mu gihe abantu 11 bakomeretse muri iki gihe cy’iminsi 15 imvura imaze igwa.  

Imvaho Nshya yamenye amakuru ko imvura yaguye ku mugoroba wo ku wa Gatatu taliki 15 Werurwe 2023 yangije bimwe mu bikorwa remezo mu Karere ka Gatsibo. 

Yangije umuhanda uhuza Santeri ya Kabeza mu Murenge wa Kiziguro n’ikigo cya G.S Rugarama mu Murenge wa Rugarama. 

Bivugwa ko umuhanda utarimo gukoreshwa bitewe n’ikiraro cyangiritse, gihuza Umurenge wa Rugarama na Kiziguro.

MINEMA iratangaza ko mu gihe imvura irimo inkuba, ko buri wese yakwihutira kugama mu nzu iri hafi, akava byihuse mu mazi. 

Abaturage barasabwa kwirinda kureka amazi no kugama munsi y’ibiti. 

Mu butumwa bwatanzwe na Minisiteri ishinzwe ibikorwa by’ubutabazi, busaba buri wese kwirinda gukoresha telefoni mu mvura no gucomokora ibyuma byose bikoresha amashanyarazi. 

Iyi Minisiteri yakomoje ku gukumira umuyaga, imyuzure n’inkangu. 

Irakangurira abaturarwanda kuzirika neza ibisenge by’inzu hifashishije imikwege yabugenewe, mwikorezi igafatanywa n’igiti giteyeho amabati. 

Gufata amazi y’imvura hakoreshejwe uburyo bwabugenewe, andi akayoborwa mu miferege iyatwara. 

Ubutumwa bwa MINEMA bugira buti “Turasaba gushishoza mbere yo kwambuka imigezi n’ibiraro.

Abafite ibinyabiziga, birinde kunyura mu mihanda irimo amazi menshi cyangwa afite umuvuduko ukabije”.

Umuhanda uhuza Kiziguro (Santeri ya Kabeza) na G.S Rugarama mu Murenge wa Rugarama ntukiri nyabagendwa
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27