Ishyaka rya UDPR rirasaba urubyiruko kurangwa n’ubutwari

Ishyaka rya UDPR rirasaba urubyiruko kurangwa n’ubutwari

Mu gihe u Rwanda rwizihiza ku nshuro ya 29 Umunsi Mukuru w’Intwari z’igihugu, Ishyaka UDPR rirasaba urubyiruko n’Abanyarwanda muri rusange gukomeza gukora ibikorwa by’ubutwari no kwimakaza indangagaciro zo gukunda igihugu.

Depite Pie Nizeyimana, Perezida wa UDPR, asobanura ko intwari ari umuntu ukurikirana icyo yiyemeje kugeraho, kikavamo igikorwa cy’ikirenga gifitiye abandi akamaro, akabikora mu bupfura n’ubwitange kandi akirinda ubugwari mu migirire ye, ntagamburuzwe n’icyo ari cyo cyose.

Depite Nizeyimana yakomoje ku kibazo cy’ibiyobyabwenge bamwe mu rubyiruko rwishoramo akagaragaza ko ntawaba intwari ari mu bikorwa bimugayisha, akarusaba kuzirikana isoko ruvomaho.

Mu kiganiro yagiranye n’Imvaho Nshya, Depite Nizeyimana yavuze ko urubyiruko rudakwiye kugamburuzwa n’ibiyobyabwenge, gushaka kwigana imico mvamahanga ahubwo ngo ruharanire kugira indangagaciro zo gukunda igihugu n’ubwitange. 

Yagize ati “Ni byinshi dukwiye kwigira ku ntwari z’igihugu kuko ni byo bizatugira abo turi bo. Ntabwo twavuga ngo tuzaba intwari kandi hari abo (Urubyiruko) tukibona barabaswe n’ibiyobyabwenge.

Ntiwaba intwari wirirwa wicaye cyangwa uri ku mbuga nkoranyambaga wifatanya n’abasebya u Rwanda, ahubwo uzaba intwari kubera ibikorwa by’ikirenga bifitiye abandi akamaro”.

Kugeza ubu intwari z’u Rwanda ziri mu byiciro bitatu, Imanzi, Imena n’Ingenzi.

Icyiciro cy’Imanzi ni cyo kiri hejuru, kikaba kigizwe n’intwari zaranzwe n’ibikorwa bidasanzwe birimo no guhara ubuzima mu rwego rwo kwitangira igihugu.

Muri iki cyiciro hashyirwamo intwari zitakiriho ubu, harimo umusirikare utazwi izina na Maj. Gen Fred Gisa Rwigema. 

Icyiciro cy’Imena kigizwe n’intwari zaranzwe n’ibikorwa by’intangarugero. 

Harimo Michel Rwagasana, Agatha Uwiringiyimana, Niyitegeka Felicité, Abanyeshuri b’i Nyange n’Umwami Mutara III Rudahigwa.

Iki cyiciro gikurikirwa n’Ingenzi ariko kugeza ubu nta muntu uragishyirwamo.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27