Lionel Messi yasezeye mu Ikipe y’Igihugu ya Argentine

Rutahizamu Lionel Messi yasezeye ku gukinira Ikipe y’Igihugu ya Argentine yari amazemo imyaka 21 ndetse ayisigira amateka yo gutwarana Igikombe cy’Isi n’ibindi bitandukanye.

Uyu mukinnyi w’imyaka 39 yanyujije ubutumwa ku mbuga nkoranyambaga kuri uyu wa Mbere tariki ya 30 Kanama 2026, avuga ko iki icyemezo cyo gusezera mu Ikipe y’Igihugu cyasunitswe cyane n’urupfu rwa Se, Jorge. Amashusho yashyize hanze y’inshamake y’ubuzima bwe muri La Albiceleste, yayakurikije amagambo ashimangira ibihe byiza yagiriye muri iyi kipe.

Yagize ati: “Mu bihe byatambutse nyuma y’umukino wa nyuma w’Igikombe cy’Isi no kubitekerezaho bihagije, ndashaka kubwira buri wese ko mfashe icyemezo cyo gusezera mu ikipe y’Igihugu. Ni icyemezo cyambabaje cyane kandi n’ubu kiracyambabaza bikomeye ku mutima, ariko ndumva ko iki ari cyo gihe gikwiye cyo gufata uyu mwanzuro.”

“Mbarahiriye ko nahoze nifuza gutanga byose mfite, bitari muri iyi myaka ya vuba itambutse twegukanyemo amarushanwa menshi. Nahoraga ntanga byose ku bw’umwambaro nabaga nambaye no ku bwo kugira ngo mwishimire kuba Abanya-Argentine binyuze mu mupira w’amaguru.”

Yongeyeho ko nubwo asezeye gukinira Ikipe y’Igihugu, yiteguye kongera gutanga umusanzu we mu kuyishyigikira mu bundi buryo, kuko akiyikunda kandi azahora ayikunda.

Uyu mukinnyi ukinira Inter Miami yo muri Leta Zunze Ubumwe za Amerika yatangiye gukinira ikipe y’Igihugu ya Argentine mu 2005 akina imikino 207, ayitsindira ibitego 125 anatanga imipira 68 yavuyemo ibitego.

Yayifashije kwegukana ibikombe bitandukanye barimo Igikombe cy’Isi cy’Abatarengeje imyaka 20 mu 2005, Umudali wa Zahabu mu Mikino Olempike ya 2008, Copa América inshuro ebyiri mu 2021 na 2024, Igikombe cy’Isi cya 2022 na Finalissima mu 2022.