FIFA yategetse FERWAFA kwishyura Adel Amrouche asaga miliyoni 530 Frw

Ishyirahamwe rya Ruhago ku Isi (FIFA) ryategetse Ishyirahamwe ry’Umupira w’Amaguru mu Rwanda (FERWAFA) kwishyura Adel Amrouche wahoze ari Umutoza w’Amavubi ibihumbi 360 by’Amadorali ya Amerika agera kuri miliyoni 530 by’amafaranga y’u Rwanda kuko yirukanywe binyuranyije n’amategeko.

Ni amakuru Imvaho Nshya yahamirijwe n’Umunyamabanga Mukuru wa FERWAFA, Bonnie Mugabe uvuga ko bakiriye icyemezo cya FIFA, bategereje ibisobanuro birambuye, bakareba uko bajya mu Rukiko rwa Siporo (TAS), kujuririra uyu mwanzuro. 

Ryagize riti “Ubunyamabanga Bukuru bwa FERWAFA buremeza ko bwakiriye icyemezo cya FIFA cyamenyeshejwe Urwego rwacu, kijyanye n’urubanza rw’umurimo rw’uwahoze ari Umutoza Mukuru, Adel Amrouche.”

“FERWAFA iremeza ko yamaze kugeza kuri FIFA ubusabe busaba ko ihabwa inyandiko yuzuye kandi yanditse igaragaza impamvu n’ibyashingiweho mu gufata icyo cyemezo. Tuzasuzuma neza izo nyandiko zikimara gutangwa.”

Iri Shyihamwe ryongeyeho ko ryiteguye kujuririra uyu mwanzuro hashingiwe ku bisobanuro rizahabwa na FIFA.

Ryagize riti “Mu gihe hagitegerejwe kwakira no gusuzuma ibisobanuro birambuye by’icyemezo, FERWAFA irateganya gukoresha inzira zose zikwiye zemewe n’amategeko ndetse n’izijyanye n’imikino kugira ngo irengere inyungu z’umupira w’amaguru mu Rwanda.

Niba ibisobanuro bizatangwa bigaragaza ko hakenewe kujurira, FERWAFA izatangira gahunda yo kubigeza mu Rukiko Mpuzamahanga rukemura Impaka zo muri Siporo (Court of Arbitration for Sport – CAS) mu gihe giteganywa n’amategeko kandi hakurikijwe amabwiriza abigenga.”

Rikomeza rigira riti: “Tuzakomeza gutanga amakuru arambuye ku bafatanyabikorwa bacu ndetse n’abaturage, nyuma yo kwakira ibisobanuro byanditse by’icyemezo no kubona inama z’abajyanama bacu mu by’amategeko ku ntambwe ikwiye gukurikira.”

Muri Mutarama 2026, ni bwo FERWAFA yatangaje ko yahagaritse Adel Amrouche nk’umutoza mukuru w’Ikipe y’Igihugu y’u Rwanda ‘Amavubi’ kubera impamvu zitandukanye.

Nyuma y’uko uyu mutoza areze ikipe yahoze FERWAFA, umwanzuro wafashwe n’Ishyirahamwe ry’Umupira w’Amaguru ku Isi (FIFA) uvuga ko igomba kumwishyura miliyoni 530 z’amafaranga y’u Rwanda arimo imishahara yamugombaga, uduhimbazamusyi n’impozamarira.

Si ubwa mbere FERWAFA iciwe amande na FIFA kubera kwirukana abatoza mu buryo binyuranyije n’amategeko’. dore ko mu 2018 uwari umutoza w’Amavubi, Jonathan McKinstry yishyuwe asaga miliyoni 150 z’amafaranga y’u Rwanda. 

Adel Amrouche yagizwe Umutoza w’Amavubi muri Gashyantare 2025, ahawe amasezerano y’imyaka ibiri, ndetse kuva icyo gihe yatsinze umukino umwe gusa wa Zimbabwe muri Nzeri.

Yasimbuwe n’Umwongereza Stephen Constantine w’imyaka 63, wahawe gutoza Amavubi mu myaka ibiri.