Kwibohora32: PL yifurije Abanyarwanda umunsi mwiza wo Kwibohora, ishimangira gukomeza kubaka Igihugu

Kwibohora32: PL yifurije Abanyarwanda umunsi mwiza wo Kwibohora, ishimangira gukomeza kubaka Igihugu

Mu gihe u Rwanda rwizihiza Isabukuru y’imyaka 32 rumaze rwibohoye, Ishyaka Riharanira Ukwishyira Ukizana kwa buri Muntu (PL) ryifurije Abanyarwanda bose umunsi mwiza wo Kwibohora, rinabashishikariza gukomeza kubungabunga ibyagezweho mu rugendo rw’iterambere n’ubumwe bw’Igihugu.

Mu butumwa yashyize ahagaragara kuri uyu wa 4 Nyakanga, PL yavuze ko Kwibohora ari umwanya wo kuzirikana urugendo rudasanzwe u Rwanda rwanyuzemo nyuma yo kubohorwa, no kwishimira intambwe rumaze gutera mu kwimakaza ubumwe n’ubudaheranwa by’Abanyarwanda, imiyoborere myiza, amahoro, ubutabera, imibereho myiza ndetse n’iterambere rirambye.

Iri shyaka ryifatanyije n’Abanyarwanda mu gushimira byimazeyo Ingabo zari iza RPF Inkotanyi, ziyobowe na Perezida wa Repubulika, Paul Kagame, kubera ubwitange n’ubutwari zagaragaje mu rugamba rwo kubohora u Rwanda no guhagarika Jenoside yakorewe Abatutsi.

Mu itangazo PL yagize iti: “Turibuka kandi tukunamira by’umwihariko intwari zatanze ubuzima bwazo, zikamena amaraso yazo kugira ngo zibohore u Rwanda n’Abanyarwanda ku ngoyi y’igitugu n’amacakubiri. Ubutwari, ubwitange n’urukundo rw’Igihugu byabaranze bizahora ari isoko y’icyizere n’umusingi Igihugu cyacu kizakomeza kubakiraho.”

PL yanagarutse ku ruhare rw’urubyiruko, irusaba gufatira urugero kuri bagenzi babo bari bagize Ingabo zari iza RPF Inkotanyi, baranzwe n’ubwitange, indangagaciro, umurava ndetse n’urukundo rw’Igihugu.

Yagize iti: “Urubyiruko rw’uyu munsi rufite inshingano zo gukomeza kubungabunga no guteza imbere ibyo u Rwanda rwagezeho, guharanira ubumwe n’ubudaheranwa by’Abanyarwanda, kurwanya amacakubiri n’icyahungabanya Igihugu cyacu, gukunda umurimo, guhanga udushya no kugira uruhare rugaragara mu kubaka u Rwanda rutekanye kandi rutera imbere.”

PL kandi yijeje Abanyarwanda ko izakomeza gutanga ibitekerezo byubaka Igihugu, kwimakaza imiyoborere myiza no kugira uruhare muri politiki n’ingamba zigamije kuzamura imibereho myiza y’abaturage.

Iri shyaka ryavuze ko rizakomeza gufatanya n’Abanyarwanda bose mu gushakira hamwe ibisubizo ibibazo bikibangamiye iterambere, hagamijwe kugera ku Rwanda rufite amahoro arambye, ubukungu bukomeye n’imibereho myiza ku baturage bose.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27