Rusizi: Amabalo 13 ya caguwa yafashwe agiye kuzanwa i Kigali

Rusizi: Amabalo 13 ya caguwa yafashwe agiye kuzanwa i Kigali

Polisi y’u Rwanda, Ishami rishinzwe kurwanya abanyereza imisoro (RPU) mu Karere ka Rusizi, ku wa Gatandatu, taliki ya 13 Kanama, ryafashe abantu babiri bari binjije mu gihugu magendu y’imyenda ya caguwa ivuye mu gihugu cy’abaturanyi cya Repubulika Iharanira Demokarasi ya Congo (RDC).

Abafashwe ni Nizeyimana Amran ufite imyaka 52 y’amavuko, wafatiwe mu Mudugudu wa Murindi, Akagari ka Ruganda mu Murenge wa Kamembe atwaye mu modoka amabaro 13 ya caguwa, na Ndagijimana Damascène w’imyaka 25 wasanganywe iwe mu rugo mu Mudugudu wa Mutara, Akagari ka Gahinga mu Murenge wa Mururu, ibitenge 410 yinjije mu buryo bwa magendu.

Chief Inspector of Police (CIP) Mucyo Rukundo, ushinzwe guhuza ibikorwa bya Polisi n’abaturage mu Ntara y’Iburengerazuba (RPCEO) yavuze ko ifatwa ry’aba bombi ryaturutse ku makuru yatanzwe n’abaturage.

Yagize ati: “Ishami rya Polisi rishinzwe kurwanya abanyereza imisoro ryahawe amakuru yizewe n’abaturage ko hari imodoka yo mu bwoko bwa Benz ifite nimero RAE 589A/RL2226 yari itwawe na Nzeyimana, ipakiye amabaro y’imyenda ya caguwa yavaga Rusizi yerekeza mu Mujyi wa Kigali. Hahise hashyirwa bariyeri muri uwo muhanda mu Mudugudu wa Murindi ubwo yahageraga abapolisi basatse imodoka yari atwaye basanga apakiye amabaro 13 y’imyenda ya caguwa ya magendu, ni ko guhita afatwa.”

Yakomeje agira ati: ”Uwitwa Ndagijimana we amakuru yavugaga ko abitse iwe mu rugo ruherereye mu Mudugudu wa Mutara,  ibitenge 410 yinjije mu gihugu mu buryo bwa magendu ari na ho yafatiwe ubwo hakorwaga ibikorwa byo kumusaka.”

CIP Rukundo yashimiye abaturage batanze amakuru iyi magendu igafatwa, asaba abijandika mu bikorwa byo kwinjiza magendu kubireka kuko inzego z’umutekano ku bufatanye n’iz’ibanze n’abaturage hakajijwe ingamba zo kubafata bagakurikiranwa.

Itegeko ry’Umuryango w’Afurika y’Iburasirazuba (EAC) rinakoreshwa mu Rwanda, ingingo yaryo ya 199, rivuga ko ibicuruzwa bya magendu byafashwe bitezwa cyamunara.

Imodoka yakoreshejwe muri ubwo bucuruzi bwa magendu na yo itezwa cyamunara ndetse umushoferi wayo agacibwa amande angana n’ibihumbi bitanu by’amadolari y’Amerika (US$5000).

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27