Abadepite batoye itegeko rishya rigenga amatora 

Abadepite batoye itegeko rishya rigenga amatora 
Abadepite batoye itegeko ngenga rigenga amatora mu Rwanda

Inteko Ishinga Amategeko Umutwe w’Abadepite yatoye itegeko ngenga rigenga amatora rishya aho uburyo Abajyanama b’Uturere n’Umujyi wa Kigali batorwagamo bugiye guhinduka bakajya batorwa mu buryo buziguye aho kuba ubutaziguye. Ni itegeko ryatowe kuri uyu wa Gatanu tariki ya 8 Gicurasi 2026, nyuma y’aho umushinga waryo wari wakorewe ubugororangingo n’abagize  Sena.

Itegeko ngenga rigenga amatora ryashyizweho mu 2019, rimaze kuvugururwa inshuro eshatu, aho rigiye kuvugururwa ku nshuro ya kane. Ubwo hemezwaga umushinga w’iryo tegeko  muri Werurwe 2026, Minisitiri w’Ubutegetsi bw’Igihugu, Habimana Dominique, yabwiye Abadepite ko iri tegeko rigiye kuvugururwa hagamijwe kunoza imigendekere y’amatora mu bihe biri imbere cyane cyane ay’inzego z’ibanze u Rwanda rurimo kwitegura.

Muri iryo Itegeko ngenga hateganyijwe ko amatora y’Abajyanama rusange umunani ku rwego rw’Akarere akorwa mu buryo buziguye. Bitewe n’imiterere y’Inama Njyanama yahindutse ubu abajyanama rusange b’Akarere bakaba ari umunani, yerekanye ko kubatora mu buryo buziguye bizatuma abaturage bose batuye Akarere badasiragizwa mu matora, ahubwo bagahagararirwa n’abo bitoreye bagize inteko itora.

Muri iryo tegeko hari kandi inteko zitora abayobozi b’Inzego z’ibanze ku rwego rw’Akarere n’urw’Umujyi wa Kigali zakuwemo hateganywa ko zizajya zigenwa n’Iteka rya Perezida, hagamijwe ko itegeko ngenga ritavugururwa buri gihe bibaye ngombwa ko abagize inteko itora bahinduka uko hagize igihinduka mu miterere n’imikorere y’Inzego z’ibanze.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27