Nyagatare: Urubyiruko ruvuga ko ntawarushuka ngo arushore mu macakubiri

Nyagatare: Urubyiruko ruvuga ko ntawarushuka  ngo arushore mu macakubiri

Urubyiruko rwo mu Karere ka Nyagatare ruvuga ko rwiteguye guhangana n’uwo ari we wese washaka kubashora mu macakubiri nk’ayaranze u Rwanda rwo hambere akarugeza ku mahano ya Jenoside yakorewe Abatutsi mu 1994. Ibi urubyiruko rubishingira ku biganiro ruhabwa by’umwihariko mu gihe cyo kwibuka Jenoside yakorewe Abatutsi mu 1994 bakabikuramo isomo rikomeye.

Uru rubyiruko ruvuga ko mu byo rwumvise ndetse rusanzwe runakura mu biganiro bya Ndi Umunyarwanda ari uko ubutegetsi bubi bwagiye bwifashisha abari urubyiruko icyo gihe mu kubaganisha mu bitekerezo byabo bibi byarimo n’umugambi wa Jenoside.

Mutabaruka Anicet yagize ati: “Abari barokamwe n’ingengabitekerezo y’urwango  gukumira igice kimwe cy’Abanyarwanda bagiye bacengeza ibitekerezo byabo mu rubyiruko bakarugaragariza ko kurwanya abo bahuje Igihugu biri mu nyungu zarwo. Amateka atwereka ko ari muri ubwo buryo urubyiruko rwashyizwe mu mitwe y’abicanyi ndetse runagira uruhare rutaziguye mu kwisenyera igihugu.”

Akomeza agira ati: “Uyu munsi rero iyo twigiye kuri ayo mateka dufata ingamba ko ntawaduca mu rihumye ngo adushore mu murongo w’urwango n’amacakubiri. Twiteguye kubaka igihugu kizira ingengabitekerezo ya Jenoside kandi kubigeraho bisaba guhaguruka tukabirwanira tunyomoza abafashe umurongo w’ubuhezanguni”.

Murungi Charon na we yagize ati: “Abumva bagifite iturufu ku rubyiruko mu bikorwa by’amacakubiri basubize amerwe mu isaho. Umunsi nk’uyu utwigisha byinshi keretse udafite amatwi yumva cyangwa amaso yitegereza ngo arebe aho amacakubiri yagejeje igihugu. Nkuko maze kumva ijambo ry’Umukuru w’Igihugu agejeje ku Banyarwanda ntabwo dukwiye kwemera gupfa kabiri”.

Rutikanga Samson na we yavuze ko atewe ishema no gukurira mu Gihugu cyimakaje ubumwe n’ubunyarwanda, umurongo utandukanye n’uwo yumva mu mateka y’ubuyobozi bwa Repubulika ya mbere n’iya Kabiri. Ati: “Amateka twarayumvise. Twumva uko igihugu cyagiye kiyoborwa gishingiye ku macakubiri mu buyobozi bwabanje kuva muri za 1959. Uyu munsi nk’urubyiruko ntituzemerera abatwinjirira ngo bongere kuduteza umwiryane w’urwango n’amacakubiri. Urubyiruko tuzaharanira igiteza imbere u Rwanda aho kurusenya nkuko byakozwe n’abari mu myaka yacu bagize ababakuriye babi bakabashora habi.”

Ibi kandi binashimangirwa n’umuyobozi w’Akarere ka Nyagatare wungirije ushinzwe Imibereho Myiza Murekatete Juliet usaba urubyiruko kutaba ba rukurikirizindi, ahubwo bagashyigikira intero yabo yo kuba imbaraga z’igihugu zubaka kandi vuba.

Ati: “Uyu munsi mufite ubuyobozi bwiza,  budaheza, buha amahirwe buri Munyarwanda, bubifuriza ibyiza. Hari abafashe umurongo mubi cyane abari hanze baba bahembera ingengabitekerezo mbi y’urwango, abo ni mwe b’ibanze bo kubarwanya. Ni mube koko imbaraga z’igihugu zubaka mwirinde ikibi cyabashora mu kwisenyera igihugu. Mureke dufatanye kwibuka twiyubaka.”

Umuyobozi w’Akarere ka Nyagatare Wungirije ushinzwe Imibereho y’Abaturage Murekatete Juliet yasabye Urubyiruko gukomeza kuba imbaraga z’Igihugu zubaka
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27