NATO yasenye misile yavaga muri Iran igana muri Turukiya

NATO yasenye misile yavaga muri Iran igana muri Turukiya

Minisiteri y’Ingabo ya Turukiya yatangaje ko ubwirinzi bwo mu kirere bw’Umuryango wo Gutabarana uhuza ibihugu by’i Burayi na Amerika (NATO), bwasenye misile za balisitike zavaga muri Iran zigana   mu kirere cya Turukiya.

Iran ikomeje kurasa mu bihugu byo mu Karere ko mu Burasirazuba bwo Hagati mu rwego rwo kwihorera kuri Isiraheli na Amerika byayigabyeho ibitero ku wa 28 Gashyantare 2026. 

Kuri uyu wa Gatatu Turukiya yatangaje ko iyo misile yarashwe nyuma yo kwambuka ikirere cya Syria na Iraq, igasenywa na sisitemu z’ubwirinzi bwo mu kirere za NATO buri mu nyanja ya Mediterane.

Ikinyamakuru Aljazeera cyatangaje ko hataramenyekana ahantu nyirizina iyo misile yari igambiriye kugwa kandi ko ubwo yaraswaga nta wahakomerekeye cyangwa ngo ahasige ubuzima.

Mu itangazo ry’iyo Minisiteri yagaragaje ko Turukiya ifite uburenganzira bwo gusubiza igikorwa icyo ari cyo cyose cy’ubushotoranyi cyayibasira, mu gihe yaburiye impande zihanganye mu ntambara gushaka uko bahosha ayo makimbirane.

Ibiro ntaramakuru by’Abongereza, Reuters byatangaje ko Minisitiri w’Ububanyi n’Amahanga wa Turukiya, Hakan Fidan mu kiganiro kuri telefone yagiranye na mugenzi we wa Iran, Abbas Araghchi yamugaragarije ko batishimiye ukuvogerwa kw’ikirere cyabo, amusaba ko bakwirinda icyatuma intambara ikwira mu Karere.

Umuvugizi wa NATO, Allison Hart, yamaganye icyo gikorwa cya Iran yongeraho ko NATO izarwana ku banyamuryango bayo na Turukiya irimo.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27