FERWAFA yamaganye abafana ba APR FC bigaragambirije ku biro byayo

FERWAFA yamaganye abafana ba APR FC bigaragambirije ku biro byayo

Ishyirahamwe ry’Umupira w’Amaguru mu Rwanda, FERWAFA n’Urwego rutegura Shampiyona y’Icyiciro cya Mbere mu Gihugu (Rwanda Premier League) byamaganye ibikorwa by’abafana ba APR FC nyuma y’umukino wahuje iyi kipe na Al Merrikh SC, bagakora ibisa n’imyigaragambyo.

Uyu mukino w’Umunsi wa 15 wa Shampiyona wabereye kuri Stade Amahoro Ku Cyumweru, tariki ya 18 Mutarama 2026.

Nyuma y’uyu mukino warangiye amakipe yombi anganya 0-0, abafana ba APR FC bijujutiye abasifuzi bavuga ko hari igitego bimwe ndetse bamwe bakorera imyigaragambyo imbere y’ibiro bya FERWAFA.

Mu itangazo FERWAFA yashyize hanze mu gitondo cyo kuri uyu wa Mbere yavuze ibi bikorwa bitemewe kuko bihungabanya umutekano w’abaturage.

Yagize iti “Ubuyobozi bw’Ishyirahamwe ry’Umupira w’amaguru mu Rwanda (FERWAFA) bufatanyije n’ubwa Rwanda Premier League, buramagana ibikorwa byaranze bamwe mu bafana ba APR FC nyuma y’umukino wahuje APR FC na Al Merrikh SC.”

“Abo bafana bagaragaje kutishimira ibyemezo by’abasifuzi bituma bakora imyigaragambyo imbere y’Icyicaro cya FERWAFA. Hari kandi abakoresheje imvugo n’ibikorwa bishobora guteza ubushyamirane no kubangamira ituze bya rubanda.”

Izi nzego zibukije abakunzi b’umupira w’amaguru ko ibyemezo by’abasifuzi bidakwiye kuba intandaro yo gushyamirana, ahubwo bakwiye gutegereza inzego zibifitiye ububasha zigafata ibyemezo.

Ku rundi ruhande, Chairman w’Icyubahiro wa APR FC, Gen Mubarakh Muganga, yavuze ko ubuyobozi bw’iyi kipe buzaza kurega umusifuzi wo ku ruhande Jabo Aristote wanze igitego cyari gutuma iyi kipe itahana amanota atatu.

FERWAFA na Rwanda Premier League bamaganye imyitwarire mibi yagaragajwe n’abafana ba APR FC ku mukino wa Al- Merrikh kubera kutishimira icyemezo cy’umusifuzi
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27