Musanze: Babangamiwe n’umuhanda Busogo- Ntebeyingwe watengutse

Musanze: Babangamiwe n’umuhanda Busogo- Ntebeyingwe watengutse

Abaturage bo mu Mudugudu wa Gora, Akagari ka Nyagisozi, Umurenge wa Busogo mu Karere ka Musanze, bavuga ko babangamiwe n’umuhanda Busogo- Ntebeyingwe watengutse ku buryo hagaragaramo imanga iteye ubwoba ishobora guteza impanuka.

Uyu muhanda usanzwe ukoreshwa n’abanyamaguru n’ibinyabiziga bitandukanye, by’umwihariko mu gutwara umusaruro w’ubuhinzi no kugeza ibiribwa ku bigo by’amashuri. 

Gusa, kubera imvura igwa ari nyunshi imivo igatemba, abaturage bavuga ko uyu muhanda wangiritse birenze urugero, ku buryo bafite impungenge ko mu minsi iri imbere bashobora kwibera mu bwigunge burundu.

Habimana Jean Pierre, umwe mu bakoresha uyu muhanda, avuga ko ari uw’ingenzi mu mibereho yabo ya buri munsi, ariko ngo kuba ugenda wangirika ushobora kuzateza akaga mu minsi iri imbere. 

Yagize ati: “Uyu muhanda ni wo twanyuzagaho umusaruro wacu w’ibirayi n’imboga tujya kuwugurisha. Ubu imodoka ziganyira kuza ino, bavuga ko ntawajya gushora imodoka ye mu manga, ibi bintu bidusubiza inyuma mu iterambere.”

Mukamana Béatrice, na we yemeza ko iyangirika ry’uyu muhanda rigira ingaruka ku burezi.

Yagize ati: “Imodoka zajyanaga ibiribwa ku mashuri zanyuraga hano. Ubu biragoye cyane, kandi abana n’abarezi barabangamiwe. Urumva kugeza ibikoresho ku ishuri rya Gatovunni ikibazo, nko kubagemurira inkwi n’ibiribwa usanga abashoferi biganyira.” 

Umuyobozi w’Akarere ka Musanze, Nsengimana Claudien, yavuze ko iki kibazo agiye kugikurikirana nyuma yokumenyeshwa n’abaturage, kandi ko kigomba kubonerwaigisubizo mu maguru mashya. 

Yagize ati: “Muri kariya gace ni ahantu hakunze kwera imyaka myinshi. Iyo umuhanda wangiritse nka twe abayobozi ntitwabirebera, byaba ari uguheza umuturage mu bwigunge. Ngiye kuvugana na Gitifu wa Busogo, kandi nanjye ngomba kuhagera kugira ngo menye amakuru nyayo n’icyakorwa.”

Uyu muhanda uhuza Akarere ka Musanze n’aka Nyabihu, ukaba unyuzwaho umusaruro n’izindi serivisi zisaba ibinyabiziga. 

Abaturage basaba ko wakorwa mu maguru mashya, mbere y’uko uteza impanuka cyangwa ugahagarika burundu ibikorwa by’iterambere.

Itenguka ry’uyu muhanda ryasize imanga, ibnyabiziga ntibikihisukira
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27