Amavubi yasoje umwaka 2025 ari ku mwanya 131 ku rutonde rwa FIFA

Amavubi yasoje umwaka 2025 ari ku mwanya 131 ku rutonde rwa FIFA

Ikipe y’Igihugu y’u Rwanda ‘Amavubi’, yasoje umwaka wa 2025 iri ku mwanya wa 131 ku rutonde ngarukakwezi rw’Ishyirahamwe ry’Umupira w’Amaguru ku Isi (FIFA) rwasohotse kuri uyu wa Mbere, tariki ya 22 Ukuboza 2025.

Muri uku kwezi n’uguheruka, u Rwanda ntirwakinnye umukino n’umwe, yewe n’umwiherero rwakoze wari aw’abakina imbere mu Gihugu.

Uku kwezi kwarangiye u Rwanda rugifite amanota 1117,78 rwagize kuva mu kwezi k’Ukwakira, rukomeza kuguma ku mwanya wa 131 rwagiyeho icyo gihe ubwo rwasubiraga inyuma imyanya ine.

Umwaka wa 2025 ntiwahiriye Amavubi y’u Rwanda dore ko mu mikino umunani mpuzamahanga yakinnye yatsinzemo umukino umwe, inganya undi ni mu gihe yatsinzwe itandatu.

Muri iyi mikino yose Amavubi yatsinze ibitego bibiri gusa yinjizwa 12.

Ubwo umwaka watangiraga, u Rwanda rwari ku mwanya wa 124 ku rutonde rwa FIFA, gusa rusoje ku mwanya wa 131 ku rutonde ruheruka, bivuze ko rwatakaje imyanya irindwi muri 2025.

Umwaka wa 2025 usize, Espagne iyoboye ku Isi aho ikurikiwe na Argentina, u Bufaransa, u Bwongereza na Brazil.

Ni mu gihe Maroc iri ku mwanya wa mbere muri Afurika ikurikiwe na Sénégal, Misiri, Algerie na Nigeria ya gatanu ziyoboye izindi kuri uyu mugabane.

Mu Karere u Rwanda ruherereyemo, ikipe iri imbere ku rutonde ni Uganda iri ku mwanya wa 85 ku Isi yagumyeho kuva mu kwezi gushize, Tanzania yagumye ku mwanya wa 112, Kenya ya 113 n’u Burundi bwa 145.

Amavubi yasoje umwaka wa 2025 ari ku mwanya wa 131 ku Isi
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27