Kigali: Hatangijwe ibihembo bya Sinema ‘iKon Awards’

Kigali: Hatangijwe ibihembo bya Sinema ‘iKon Awards’

Ku mugoroba wo ku wa Gatanu tariki 12 Ukuboza 2025, ibyamamare bitandukanye byahuriye kuri Kigali Paramount Hotel, mu gikorwa cyo gutangiza ku mugaragaro umuhango w’ibikorwa by’ibihembo bya ‘iKON Awards’.

iKON Activate Kigali ni igikorwa cya kane cyateguwe muri uyu mwaka hirya no hino muri Afurika, mu gihe ibikorwa byabanje byabereye muri Nigeria, Kenya na Uganda, ubu bikaba byabereye mu Mujyi wa Kigali.

Ibihembyo bya ‘iKON’ 2026 bizatangwa umwaka utaha, bizaba bifite insanganyamatsiko igira iti ‘Hirya y’Imbibi’.

Ni ibihembo bigamije kugaragaza impano mu gukora Sinema no gukomeza guteza imbere uruganda rw’ubuhanzi binyuze mu bufatanye bwo ku mugabane wose.

Humphrey Nabimanya, Umuyobozi Mukuru wa iKON Awards, agira ati: “Turashaka kuvuga inkuru za Afurika binyuze mu bufatanye n’ibirimo gukorerwa aho kandi bifite uruhare runini mu kugeza inkuru za Afurika ku Isi, nk’uko byagenze mu nganda zateye imbere.

Kigali ni imwe mu Mijyi igenda iba igicumbi cy’ikorwa rya filime muri Afurika y’Iburasirazuba, ifite inkuru nyinshi nyafurika zo kuvuga. Byongeye, ifite ibikorwaremezo byiza n’ahantu hatandukanye ho gufatira amashusho, bityo hakaba hari amahirwe yo kwifashisha ibyo mu guteza imbere uru ruganda.”

Ibikorwa bya Activate bihuriza hamwe abakora filime, inzego za Leta n’abikorera kugira ngo baganire ndetse bashyireho ubufatanye bwiza n’amahirwe yo gushora imari.

Igikorwa cya mbere cyabereye muri Nigeria cyahuje abakora filime bakomeye bo muri iki gihugu na Uganda, amashyirahamwe y’inganda z’ubuhanzi n’abafatanyabikorwa barimo Uche Agbo (Perezida wa DGN), Patrick Lee (Viva Cinemas Nigeria), ubuyobozi bwa FDAN, n’umukinnyi akaba n’umuyobozi wa filime Ramsey Nouah.

iKON Awards ni ibihembo ngarukamwaka muri Sinema bitegurwa na televiziyo yo muri Uganda hagamijwe guhemba no gushimira abakora ubugeni, ubudasa n’udushya mu ruganda rwa filime n’ubuhanzi.

Ibi bihembo bigamije kandi guha icyubahiro no gushimira impano zidasanzwe, imishinga n’umusanzu w’abantu bateza imbere uru ruganda haba mu gihugu no ku rwego mpuzamahanga.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27