Hong Kong: Hashyizweho Komite yigenga ikora iperereza ku nkongi yahitanye 151

Hong Kong: Hashyizweho Komite yigenga ikora iperereza ku nkongi yahitanye 151

Umuyobozi w’Umujyi wa Hong Kong, John Lee yategetse ko hashyirwaho Komite yigenga igomba gukora iperereza ku cyateje inkongi y’umuriro ikomeye yahitanye  abantu 151, igakomeretsa abarenga 80.

Ku wa gatatu w’icyumweru gishize, nibwo inyubako zirindwi mu munani ndende zo mu mudugudu wa Wang Fuk Court, mu karere ka Tai Po zibasiwe n’inkongi y’umuriro yatumye benshi bahasiga ubuzima.

Iperereza rigaragaza ko iyo nkongi yatijwe umurindi n’ibikoresho byakoreshejwe mu kuzivugurura ndetse abantu 13 barimo n’abayobozi ba sosiyete y’ubwubatsi yari muri iyo mirimo bamaze gutabwa muri yombi.

Urwego rushinzwe ibikorwa by’ubutabazi rwatangaje ko iyo nkongi ari yo yahitanye abantu benshi mu myaka 70 ishize, kandi ko uwo mubare ushobora kwiyongera kuko hari imibiri igikomeje gushakishwa.

Umuyobozi wa Hong Kong, John Lee, kuri uyu wa 02 Ukuboza mu kiganiro n’abanyamakuru yavuze ko iyo Komite izayoborwa n’umucamanza kandi izakora ivugurura ryimbitse, anongeraho ko azakora uko ashoboye kugira ngo impanuka nk’izo zitongera kubaho.

Iyo nkongi yamaze amasaha 40 itarazimywa ndetse nyuma Polisi yatangaje ko yahise yinjira mu nyubako ngo itangire iperereza kandi rishobora kuzafata hagati y’ibyumweru bitatu n’ukwezi.

Umudugudu wa Wang Fuk Court wubatswe mu 1983, ndetse imibare ya Leta ya 2021, igaragaza ko wari utuwe n’abantu  4.600.

Hashyizweho komite yigenga ikora iperereza ku nkongi yahitanye 151 muri Hong Kong
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27