Indonesia: Inkongi yahitanye batatu bishinjwa abigaragambya

Indonesia: Inkongi yahitanye batatu bishinjwa abigaragambya

Abantu batatu bapfuye abandi batanu bakomerekera mu nkongi y’umuriro yibasiye inyubako y’Inteko Ishinga Amategeko iri mu Mujyi wa Makassar mu Ntara ya Sulewesi mu Burasirazuba bwa Indonesia, bishinjwa abigaragambya.

Ikigo gishinzwe imicungire y’ibiza muri icyo gihugu cyemeje ayo makuru mu itangazo cyasohoye kuri uyu wa Gatandatu kivuga ko iyo nkongi yadutse ku mugoroba wo ku 29 Kanama aho babiri bahapfiriye undi umwe akagwa mu bitaro.

Ibiro Ntaramakuru by’Abafaransa, AFP cyatangaje ko abandi batanu bakomerekejwe n’inkongi bajyanywe mu bitaro mu gihe abagera kuri 200 bakomerekeye mu myigaragambyo.

Uburakari bw’abigaragambya bwazamuwe n’amashusho yasakaye y’urupfu rw’umugabo wari utwaye ibicuruzwa kuri moto wagonzwe na Polisi.

Ibyo byatumye benshi bajya mu mihanda batangira kwigaragambya bamagana ibikorwa n’inzego za Leta n’imishahara igayitse ihabwa abakozi.

Iyo myigaragambyo yasakaye mu Mijyi itandukanye irimo uwa Bandung, aho abigaragambya bibasiye inzu z’ubucuruzi, amabanki, amaresitora ndetse bahangana n’inzego z’umutekano zabateraga ibyuka biryana mu maso.

Icyakoze Polisi yatangaje ko yafashe abantu barindwi ngo bakorweho iperereza ku rupfu rw’uwo mugabo wari utwaye ibicuruzwa kuri moto.

Perezida w’icyo gihugu, Prabowo Subianto yasabye abaturage gutuza ategeka ko hakorwa iperereza kuri izo mvururu ndetse asura umuryango w’uwo mushoferi.

Indonesia bari kwigaragambya bamagana imishahara mito no guhohoterwa na Leta
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27