Zelensky yavuze ko Ukraine itigeze itsindwa kandi izakomeza kurwana

Zelensky yavuze ko Ukraine itigeze itsindwa kandi izakomeza kurwana

Perezida wa Ukraine Volodymyr Zelensky, yatangaje ko Igihugu cye kizakomeza kurwana no guharanira ubwigenge kandi batigeze batsindwa ndetse inzira z’ibiganiro by’amahoro zikomeje guharurwa.

Mu ijambo rikomeye yagejeje ku bitabiriye Umunsi Mukuru w’Ubwigenge bwa Ukraine kuri iki Cyumweru, Zelensky yasobanuye ko hakenewe amahoro kandi ahazaza habo ari bo bagomba kuhagena.

Yagize ati: ”Ukraine ntiyatsinze ariko ntiranatsindwa. Dukeneye amahoro, aho ejo hazaza hacu ari twe tuzahagena, Ukraine ntituri abababajwe ahubwo turi indwanyi.” 

BBC yatangaje ko amagambo ya Zelensky aje nyuma yuko Moscow ivuze ko Ukraine yagabye ibitero ku  bikorwa remezo by’ingufu by’u Burusiya mu ijoro ryashize, ivuga ko ibitero bya drone byateje inkongi ku rugomero ruri i Kursk mu Burengerazuba bw’u Burusiya.

Bamwe mu bitabiriye ibyo birori by’Ubwigenge barimo Minisitiri w’Intebe wa Canada Mark Carney, yavuze ko bazahora ku ruhande rwa Ukraine kandi muri Nzeri bazabaha indege n’imodoka by’intambara bya miliyoni 534 z’amapawundi.

Zelensky yashimiye ibihugu byamubaye hafi by’umwihariko Leta Zunze Ubumwe za Amerika ndetse yambika umudali w’ishimwe intumwa yihariye ya Perezida Donald Trump, Keith Kellogg.

Ku ruhande rw’u Bwongereza, Minisiteri y’Ingabo yatangaje ko bazakomeza guhugura abasirikare ba Ukraine kugeza nibura ku mpera za 2026.

Ni mu gihe Norvege na Suwede na byo byijeje Ukraine ubufasha burambye mu bya gisirikare.  

Hagati aho ariko Perezidansi ya Ukraine n’u Burusiya kuri uyu wa 24 Kanama 2025, byatangaje ko habayeho guhererekanya imfungwa, aho buri ruhande rwasubije abasirikare 146.

Minisiteri y’Ingabo y’u Burusiya yavuze ko abantu umunani bo mu Karere ka Kursk, aho Ukraine yari yarigaruriye bari mu bahererekanyijwe kandi bagomba gutaha.

Perezida Zelensky yavuze ko abo u Burusiya bwabasubije barimo abasirikare, abari bashinzwe kurinda imipaka ndetse n’abasivile kandi abenshi muri bo bari barafunzwe  mu 2022.

Ukraine yijizihije Umunsi Mukuru w’Ubwigenge irahirira gukomeza kubuharanira
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27