Musanze: Abakoresha umuhanda Gataraga–Shingiro bifuza ko watunganywa

Musanze: Abakoresha umuhanda Gataraga–Shingiro bifuza ko watunganywa

Abaturage bo mu Mirenge ya Gataraga na Shingiro bifuza ko umuhanda uhuza iyo Mirenge wakorwa kuko kuba warangiritse bikabije bikabangamira ubuhahirane n’itwarwa ry’umusaruro wabo, bakifuza ko watunganywa.

Bavuga ko wuzuyemo ibinogo n’amabuye manini, bigatuma imodoka zitabasha kuwukoresha, bikabangamira ubuhahirane n’itwarwa ry’umusaruro wabo.

Uyu muhanda ukoreshwa cyane mu kugeza umusaruro ku masoko, ariko kuba utameze neza bituma abahinzi batabasha kugeza ibyo bejeje ku isoko ku gihe, cyangwa bagakoresha uburyo butabahesha inyungu.

Muhayimana Godelieve, utuye mu Murenge wa Gataraga, yagize ati: “Muri kano gace kacu hera imyaka inyuranye harimo ibirayi, ibishyimbo, ibitunguru n’ibindi. Ariko kugira ngo tubigeze mu mujyi wa Musanze dukoresha amagare cyangwa umutwe, ibi biraduhombya. Ikindi, umusaruro wacu usigara hano ugacuruzwa ku giciro gito.”

Nsanzimfura Gaspard, umwe mu baturage bo muri Shingiro, na we avuga ko ikibazo cy’uwo muhanda kimaze igihe

Yagize ati: “Umuhanda wuzuyemo amabuye ashinyitse n’ibinogo byinshi. Imodoka zanga kuhanyura, ndetse n’imbangukiragutabara ntiyapfa kuhagera. Turasaba ko nibura bawuringaniza, bakavanamo amabuye, hanyuma bagashyiramo igitaka bikoroshya kuhanyura.”

Uwanyirigira Clarisse, Umuyobozi w’Akarere ka Musanze wungirije ushinzwe Iterambere ry’Ubukungu, yemeza ko ubuyobozi bwamenye ikibazo cy’uwo muhanda kandi hari gahunda yo kuwukora.

Yagize ati: “Turabizi ko umuhanda wa Gataraga–Shingiro umeze nabi. Twamaze kuwushyira muri gahunda y’imyaka itanu (DDS), ariko kugeza ubu ntiturabona ubushobozi bwo kuwukora.”

Imirenge ya Gataraga na Shingiro ni imwe mu itanga umusaruro mwinshi w’ubuhinzi mu karere ka Musanze, harimo ibirayi, tungurusumu n’ibindi, byinshi muri byo bikajyanwa no ku isoko ry’i Kigali.

Gutunganya uwo muhanda byafasha cyane kuzamura ubukungu n’imibereho y’abaturage bahatuye.

Umuhanda Gataraga- Shingiro wuzuye amabuye ashinyitse
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27