Nyabihu: Bigogwe abarokotse Jenoside bahangiyikishijwe n’inzu n’ubwiherero bishaje

Nyabihu: Bigogwe abarokotse Jenoside bahangiyikishijwe n’inzu n’ubwiherero bishaje

Abarokotse Jenoside yakorewe Abatutsi mu 1994 batujwe mu Murenge wa Bigogwe, mu Mudugudu wa Nyagafumberi, bavuga ko babangamiwe no kuba inzu bubakiwe ndetse n’ubwiherero byarashaje ku buryo ngo bafite impungenge ko zishobora kubagwaho cyangwa se bakaba batengukana n’ubwiherero.

Abatuye muri uwo Mudugudu basaba inzego bireba kubafasha gusanirwa ku buryo bahitamo kujya gutira ubwiherero ahandi.

Umwe mu baganiriye na Imvaho Nshya yagize ati: “Twubakiwe hano inzu zifite ubwiherero rusange, ariko byose birashaje, ari inzu nazo ni uko urabona ko zasadutse inkuta hari ubwo amazi aza akadendeza kugera mu bikoni byacu uretse no kuba ubu bwiherero bwarasenyutse na bwo kugerayo ni ikibazo kuko amazi araza akuzura imbere ya bwo mu bihe by’imvura twifuza ko badusanira byose.”

Undi mukecuru na we yabwiye Imvaho Nshya ko bagorwa no gukora ingendo bajya gutira ubwiherero.

Yagize ati: “Ubu kubera kugira amakenga iyo dushaka kujya mu bwiherero tujya mu bw’abaturanyi, hari ubwo usanga nyir’urugo arimo bikagusaba kumutegereza cyangwa se ugacunga ukajya mu rundi rugo, twifuza ko baza bakadusanira kuko uroye byose bimaze gusaza.”

Umuyobozi w’Akarere ka Nyabihu, Mukandayisenga Antoinette, avuga ko iki kibazo bamaze kukimenya, igisigaye ni ukureba uburyo cyakemuka.

Yagize ati: “Yego amakuru turayafite twamenye ko ubwiherero n’inzu zabo zifite ikibazo, ntabwo twari tuziko ubwiherero bwasenyutse burundu ngiye kubiganiraho n’ubuyobozi bw’umurenge tubanze twifashishe umuganda ku bikorwa bitagoye byaba bihari”.

Abatujwe mu Mudugudu wa Gafumberi barokotse Jenoside yakorewe Abatutsi mu 1994, abenshi ni abageze mu za bukuru bakaba barahatujwe ari imiryango 15, mu mwaka wa 2007.

Ubwiherero bw’abarokotse batuye mu Bigogwe mu Karere ka Nyabihu bukeneye gusanwa
Mu bihe by’imvura, imbere y’ubwiherero bwo mu Mudugudu wa Gafumberi huzura amazi
Ubwiherero bwatangiye guhirima
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27