Sena yemeje abakomiseri 8 ba NEC barimo umwe mushya

Sena yemeje abakomiseri 8 ba NEC barimo umwe mushya

Abagize Sena y’u Rwanda bemeje abakomiseri 8 baherutse kugenwa n’Inama y’Abaminisitiri, ko bajya muri Komisiyo y’Igihugu y’Amatora (NEC), bakaba barimo 7 bari basanzwemo biyongeraho Habimana Kizito utari usanzwe muri iyo Komisiyo.

Ni igikorwa cyabaye kuri uyu wa Gatanu tariki ya 4 Mata 2024, nyuma y’aho Inteko Rusange ya Sena yasesenguye Raporo ya Komisiyo ya Politi n’Imiyoborere muri Sena, isabira abo kuba Abagize Komisiyo ya NEC.

Habimana Kizito wigeze kuba Umunyabanga Nshingabikorwa w’Intara y’Iburasirazuba akaba yemejwe ku mwanya wa Visi Perezida wa NEC.

Mu bandi bemejwe na Sena y’u Rwanda kuba abakomiseri muri NEC, barimo Oda Gasinzigwa ku mwanya wa Perezida wa NEC, akaba yari asanzwe kuri uwo mwanya kuva mu 2020.

Hemejwe kandi abakomiseri ba NEC, barimo Fortunee Nyiramadirida, Mutimukeye Nicole, Umwari Carine, Semanywa Faustin, Francoise Uwera Kabanda ndetse na Judith Mbabazi.

Abasenateri babemeje bashingiye ku kuba biganjemo abateguye amatora y’Umukuru w’Igihugu kandi yagenze neza, bakaba bizeye neza ko bazashyira mu bikorwa inshingano zabo muri Komisiyo.

Kugira ngo umuntu yemererwe kuba umwe mu bakomiseri ba Komisiyo y’Igihugu y’Amatora, agomba kuba ari Umunyarwanda, afite impamyabumenyi y’icyiciro cya kabiri cya Kaminuza (A0), yakuye muri kaminuza n’amashuri makuru byemewe na Leta. Agomba kuba afite ubunararibonye mu nzego z’imiyoborere ya Leta cyangwa mu z’abikorera.

Mu bindi, asabwa kuba ari indakemwa mu mico no myifatire kandi akaba atarahamijwe ibyaha bya Jenoside n’ingengabitekerezo yayo.

Amategeko ataganya ko kandi agomba kuba atarakatiwe n’inkiko igihano kingana cyangwa kirenze amezi atandatu.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27