Handball: Police HC na Kiziguro SS zegukanye Igikombe cy’Intwari cya 2025

Handball: Police HC na Kiziguro SS zegukanye Igikombe cy’Intwari cya 2025

Ikipe ya Police HC mu bagabo na Kiziguro SS mu bagore zegukanye igikombe cyo kwizihiza Intwari z’u Rwanda ryasojwe kuri iki Cyumweru tariki ya 19 Mutarama 2025 mu Karere ka Gicumbi. 

Iri rushanwa ryari rimaze iminsi ibiri ribera ku Mulindi w’Intwali mu Karere ka Gicumbi ryateguwe ku bufatanye bw’Ishyirahamwe Nyarwanda ry’Umukino wa Handball n’Urwego rushinzwe Intwari z’Igihugu, Imidali n’Impeta by’Ishimwe (CHENO).

Mu bagabo hitabiriye amakipe atandatu agabanyije mu matsinda abiri, aho irya mbere ryari rigizwe na Police HC, Gicumbi HC, UR-Rukara HC na UB Sports HC. 

Itsinda rya kabiri ryarimo APR HC, ES Kigoma, UR Huye na TTC de la Salle.

Amakipe atanu yitabiriye mu bagore yari Kiziguro SS, ES Nyamagabe, UoK, UR Huye, UR Rukara.

Police HC yari imeze neza kuko yatangiye iri rushanwa itsinda UB Sports ibitego 27-11 iyobora itsinda yari iherereyemo. 

Yakomereje muri uwo mujyo kugeza ku mukino wa nyuma yatsinzemo mukeba APR HC ibitego 31-22.

Mu bagore, Kiziguro SS yegukanye igikombe cy’Intwari ku nshuro ya kane yikurikiranya, nyuma yo gutsinda E.SC. Nyamagabe ibitego 36-20.

Muri iyi mikino hakinnye kandi n’icyiciro cy’abatarengeje imyaka 17, aho mu bakobwa Kiziguro SS yatsinze ES Nyamagabe ibitego 18-13.

Mu bahungu, TTC de la Salle yatsinze ADEGI ibitego 25-24.

Umunsi w’Intwari z’Igihugu uzizihizwa ku nshuro ya 31 tariki ya 1 Gashyantare 2025, ufite insanganyamatsiko igira iti “Ubutwari n’Ubumwe bw’Abanyarwanda, Inkingi z’Iterambere.”

Wari umukino ukomeye ku mpande zombi mu kibuga
Police HC yatsinze APR iyirusha cyane mu gice cya kabiri
Ikipe y’abakobwa ya Kiziguro SS yegukanye Igikombe cy’Intwari, ku nshuro ya kane yikurikiranya
Abakinnyi ba Police HC bishimira gutsinda APR HC ku mukino wa nyuma
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27