Umunyamakuru Habababyeyi Pascal wakoreraga Radio&TV10 yitabye Imana

Umunyamakuru Habababyeyi Pascal wakoreraga Radio&TV10 yitabye Imana

Umunyamakuru wakoreraga Radio/TV10, Pascal Habababyeyi, yitabye Imana.

Habababyeyi yakoraga ikiganiro buri Cyumweru kuri Radio na TV 10 cyitwa Ahabona gisesengura amakuru yaranze icyumweru.

Amakuru yatangajwe mu bitangazamakuru no ku mbuga nkorambaga agaragaza ko Habababyeyi ku wa Gatandatu yajyanywe kwa muganga ari muri koma akaba yahise yitaba Imana.

Inshuti ze za hafi zatunguwe ndetse zinashengurwa n’urupfu rwe zikanemeza ko yari afite ubukwe ku wa Kane tariki 26 Ukuboza 2024.

Umuyobozi Mukuru wungirije wa CHUK, Prof Nyundo Martin, yabwiye itangazamakuru ko aya makuru yayamenye kuko uyu munyamakuru yari asigaye ashinzwe Itumanaho mu Bitaro bya Kaminuza bya Kigali, CHUK.

Umuyobozi Mukuru wa Tele10 Group ibarizwamo Radio 10 na TV10, Augustin Muhirwa, yavuze ko amakuru y’ibanze yabonye ariko Pascal Habababyeyi yazize uburwayi butunguranye.

Umunyamakuru Oswald Mutuyeyezu ukorera Radio 10 & TV10, bakoranaga ikiganiro yavuze ko nyakwigendera yari umwe mu nshuti ze za hafi ku buryo yashenguwe no kumva ko yitabye Imana anahamya ko yari afite ubukwe vuba aha.

Ati “Inkuru babimbwiye mu gitondo, kugeza ejo nta kibazo yari afite. Yari afite ubukwe kuri Boxing Day, umunsi ukurikira Noheli.”

Mutuyeyezu asobanura Habababyeyi nk’umuntu wari imfura, witanga, kandi wari inshuti ye ya hafi.

Ati “Buriya ikiganiro dukora cyitwa Ahabona, cyagarutse ari njye na we tukigaruye, kuva mu 2018, hari hashize imyaka itandatu tugikora kidasiba.”

“Nta mezi menshi yari ashize ageze muri CHUK, kuko mbere yakoraga mu Bitaro bya Rutongo ashinzwe Inozamubano. Hari hashize amezi make abonye akazi nk’ushinzwe Itumanaho kuri CHUK.”

Yakomeje agira ati: “Ni we mwana w’umuhungu nyina ayari afite, bari babiri we na mushiki we. Ni inkuru y’urupfu yambabaje.

Twakoranaga ikiganiro, tukiganirira, tukarebana umupira, tugasangira, yari umuntu wanjye wa hafi.”

Sangiza abandi iyi nkuru
Ibitekerezo 1
Mukiza Eric

Aruhukire mu mahoro kandi Imana ikomeze abasigaye.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27